Gaıtıde 1,3 mln adam qarýly bandalardan qashyp, úılerin tastap ketti

ASTANA. KAZINFORM — Qarýly bandalar tarapynan jasalǵan zorlyq-zombylyq saldarynan Gaıtıde shamamen 1,3 mıllıon adam úıin tastap, el ishinde qonys aýdarýǵa májbúr boldy, dep jazady Anadoly.

Bul týraly Birikken Ulttar Uıymynyń Halyqaralyq kóshi-qon uıymy (MOM) málimdedi.

Halyqaralyq kóshi-qon uıymy málimetinshe, Gaıtıde ishki qonys aýdarýdyń rekordtyq deńgeıi tirkelgen: zorlyq-zombylyqtan qutylý úshin 1,3 mıllıonǵa jýyq adam óz baspanalaryn tastap ketken.

— 2024 jyldyń jeltoqsanynan beri qonys aýdarǵandardyń sany 24%-ǵa artqan, — dep atap ótti uıym.

Uıymnyń bas dırektory Emı Poýp óz málimdemesinde bul sandardyń artynda shynaıy adam taǵdyrlary turǵanyn erekshe atap ótti.

— Balalar, analar, qarttar — olardyń kópshiligi birneshe ret úıinen bas saýǵalap qashýǵa májbúr bolǵan, kóp jaǵdaıda eshteńe alyp úlgermegen. Qazir olar óte qaýipti jáne turaqsyz jaǵdaıda ómir súrip jatyr. Biz dereý áreket etýimiz kerek. Bul daǵdarys «jańa qalypty jaǵdaı» bolmaýy tıis, — dedi Emı Poýp.

BUU baǵalaýynsha, 2024 jyly Gaıtıde qarýly toptardyń shabýyldarynan 5600-den astam adam qaza tapqan.

Gaıtı elinde saıası, ekonomıkalyq jáne gýmanıtarlyq daǵdarys áli de ýshyǵyp tur. Astanasy Port-o-Prenstiń 80%-dan astam aýmaǵyn qarýly toptar baqylaýynda ustap otyr. El halqy 11 mıllıonnan asady jáne mıllıondaǵan adam asharshylyq qaýpine tap bolyp otyr.

Budan buryn habarlanǵandaı, Gaıtıde qarýly top shabýylynan 12 adam qaza tapty.