Gaıtı aralynda kúshti jer silkinisi boldy
ASTANA. Qańtardyń 13-i. QazAqparat Gaıtı araldarynda kúshi 7 baldyq jer silkinisi tirkeldi.
Bul týraly CNN telekompanııasy AQSh-tyń Geologııalyq qyzmetine silteme jasap habarlap otyr.
Kelip túsken málimetter boıynsha, jerasty dúmpýiniń kindigi Gaıtı elordasy - Port-o-Prens qalasynan batysqa qaraı 20 shaqyrymdaı jerde ornalasqan.
Buqaralyq aqparat quraldarynyń derekteri boıynsha, zilzala saldarynan Peshnvılle qalasyndaǵy aýrýhana qıraǵan.
Málim bolǵan taǵy bir jaıt: Gaıtı jaǵalaýynan birneshe mıl qashyqtyqta birneshe mınýt boıy eki jer silkinisi bolǵan.
Qaıtalanǵan jerasty dúmpýleriniń magnıtýdasy 6 baldy qurady, dep habarlaıdy Reıter agenttigi. Qurban bolǵandar men zardap shekkender týraly ázirge málimet joq.
Seısmıkalyq ortalyq buǵan deıin Gaıtı, Kýba, Bagam araldary jáne Domınıkan Respýblıkasynyń jaǵalaýlarynda tsýnamı paıda bolý qaýpi týraly eskertken bolatyn.
