Gagarınniń qyzy Qurmetti legıon ordeniniń ofıtseri atandy
ASTANA. QazAqparat - Máskeý Kremli mýzeıleriniń bas dırektory Elena Gagarına men Úlken teatrdyń bas dırektory Vladımır Ýrın Qurmetti legıon ordeniniń ofıtseri atandy, dep habarlady TASS.
Olarǵa nagradany Frantsııanyń RF-daǵy elshisi Jan-Morıs Rıper tapsyrdy.
«Frantsııa men Reseı arasyndaǵy qatynastar qazir qıyn kezeńderdi bastan ótkerýde. Degenmen Frantsııanyń reseılik mádenıet mekemelerin, atap aıtqanda, Máskeý mýzeılerin tanýy baǵaly», - dedi marapattaý ústinde Elena Gagarına.
Úlken teatrdyń bas dırektory nagradany ala otyryp, barlyq teatrlyq jobalar frantsýz áriptesterimen birge júzege asyrylǵanyn atap ótti.
Erekshelik belgilerin tapsyrý Frantsııanyń RF-daǵy elshisiniń máskeýlik rezıdentsııasynda ótti. Nagradalarmen olardyń eki eldiń mádenı baılanystaryn damytýǵa qosqan úlesi atalyp ótti.
Elena Gagarına - ónertanýshy, adamzattyń alǵashqy ǵaryshkeriniń qyzy. «Máskeý Kremli» Memlekettik tarıhı-mádenı mýzeı-qoryǵynyń bas dırektory. Bul qyzmetke 2001 jylǵy 12 sáýirde adamnyń ǵaryshqa ushyrylǵanyna 40 jyl tolǵan kúni taǵaıyndaldy.
Vladımır Ýrın Memlekettik akademııalyq úlken teatrdyń basshysy bolyp 2013 jyly taǵaıyndaldy.
Qurmetti legıon ordenin Napoleon Bonapart 1802 jylǵy 19 mamyrda taǵaıyndaǵan. Orden Frantsııa aldyndaǵy erekshe sińirgen eńbegin tanýdyń joǵarǵy erekshelik belgisi bolyp tabylady.
