Gadjı Gadjıev qaza tapqan áskerılerdiń otbasyna 100 mln teńge kómek kórsetedi
ASTANA. KAZINFORM — Qazaqstan Halyq Keńesiniń múshesi Gadjı Gadjıev Kaspıı teńizindegi oqý-jattyǵý kezinde qaza tapqan áskerı qyzmetshilerdiń otbasylaryna qarjylaı kómek kórsetiletinin málimdedi.
Qazaqstan Halyq Keńesiniń taǵy bir múshesi, Qazaqstan aýyr atletıka federatsııasynyń prezıdenti Gadjı Gadjıev qaza tapqan áskerı qyzmetshilerdiń otbasylaryna 100 mln teńge kóleminde materıaldyq kómek kórsetý týraly sheshim qabyldaǵanyn habarlady.
— Memleket basshysy Qasym-Jomart Toqaev Mańǵystaý oblysynda áskerı qyzmetshilerdiń qaza bolýyna baılanysty jalpyulttyq aza tutý jarııalady. Kaspıı teńizinde ótken oqý-jattyǵý kezinde qaza tapqan áskerı qyzmetshilerdiń týǵan-týystary men jaqyndaryna qaıǵyryp kóńil aıtamyn. Qazaqstan Halyq Keńesiniń múshesi ári elimizdiń sport qaýymdastyǵynyń ókili retinde qaza tapqan áskerı qyzmetshilerdiń otbasylaryna 100 mıllıon teńge kóleminde materıaldyq qoldaý kórsetýdi ózimniń azamattyq paryzym dep sanaımyn. Áskerı boryshyn óteý kezinde qaza tapqan jaýyngerlerdiń jarqyn beınesi jadymyzda máńgi saqtalady, — dedi Qazaqstan aýyr atletıka federatsııasynyń prezıdenti.
Buǵan deıin belgili kásipker, Qazaqstan Halyq Keńesiniń múshesi Shahmurat Mútálip qaza tapqan áskerı qyzmetshilerdiń otbasyna 25 mln teńgeden bóletinin aıtty.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Budan bólek, Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy. Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna baryp, áli tabylmaǵan áskerı qyzmetshilerdi úzdiksiz izdestirýdi tapsyrdy.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
