Gadjetterdi túnde qýattaýǵa qaldyrý nege qaýipti
ASTANA. KAZINFORM – Telefon, planshet jáne basqa da elektrondyq qurylǵylardy túnde nemese uzaq ýaqyt qaraýsyz qýattaý qysqa tuıyqtalý men órtke ákelýi múmkin, dep habarlaıdy Tótenshe jaǵdaılar mınıstrligi.
Mınıstrlik málimetinshe, aqaýly qýattaǵysh nemese zaqymdalǵan kabel qurylǵynyń shamadan tys qyzyp ketýine, qysqa tuıyqtalýǵa jáne sonyń saldarynan órttiń shyǵýyna sebep bolýy yqtımal.
Ásirese gadjetterdi tósek, dıvan, jastyq nemese kórpeniń ústinde qýattaý qaýipti. Jumsaq materıaldar jylýdyń qalypty taralýyna kedergi keltirip, qurylǵynyń qyzyp ketý qaýpin arttyrady.
Sondaı-aq qýattalyp jatqan telefon men basqa da qurylǵylardy perde, qaǵaz jáne tez tutanatyn ózge zattardan alys ustaý qajet.
– Túnde adam aqaýdy nemese qurylǵynyń qyzyp ketkenin der kezinde baıqamaýy múmkin. Al bolmashy tehnıkalyq aqaý qysqa ýaqytta órtke ulasýy yqtımal. Sondyqtan qýattalyp jatqan gadjetterdi qaraýsyz qaldyrmaý qajet, – dep eskertti TJM.
Mamandar tek jaramdy ári sapaly qýattaǵyshtardy paıdalanýǵa keńes beredi. Zaqymdalǵan kabelder men aqaýly elektr jabdyqtaryn qoldanýǵa bolmaıdy. Qurylǵy qýattalyp bolǵannan keıin adapterdi elektr jelisinen ajyratqan jón.
Tótenshe jaǵdaı týyndaǵan jaǵdaıda 112 nómirine habarlasý qajet.
Aıta keteıik, Atyraýda jyl basynan beri turǵyn úılerde 90 órt tirkeldi.
