Gabon jaǵalaýynda munaı platformasy sýǵa batyp, úsh adam qaza tapty
ASTANA. KAZINFORM — Gabon jaǵalaýyndaǵy Gvıneıa shyǵanaǵynda munaı platformasy apatqa ushyrap, úsh adam qaza tapty. Taǵy eki adam iz-túzsiz joǵalǵandar qatarynda.
Oqıǵa 24 qazanda Maıýmba qalasy mańynda bolǵan. Bul týraly jergilikti info241.com portaly habarlady. Munaı platformasy aýdarylyp, sýǵa batyp ketken. Apat kezinde bortta 115 adam bolǵan. Qutqarýshylar olardyń 110-yn evakýatsııalaǵan.
Buǵan deıin apat saldarynan 5 adamnyń joǵalǵany habarlanǵan edi.
Gabon prezıdenti Brıs Olıgı Ngema jaǵdaıdy baqylaýda ustap otyrǵanyn málimdep, áskerı-teńiz kúshterin qosa alǵanda, barlyq qajetti memlekettik resýrsty jumyldyrýdy tapsyrdy.
Eldiń Munaı jáne gaz mınıstrligi apattyń sebebin, sondaı-aq oqıǵaǵa kimniń jaýapty bolýy múmkin ekenin anyqtaý úshin tergeý bastady. Osyǵan baılanysty daǵdarys shtaby quryldy.
Apattyń aldyn ala boljanǵan sebepteri qatarynda platformanyń mehanıkalyq júıesindegi aqaý men aýa raıynyń kúrt nasharlaýy qarastyrylyp jatyr.
Aıta keteıik, Qyzyl teńizde shabýylǵa ushyraǵan júk kemesi sýǵa batyp ketti.
