Gabon men Vetnamǵa baryp kelgen almatylyqtardan bezgek aýrýy anyqtaldy
ALMATY. KAZINFORM — Ótken aptada Almatyda bezgek (malıarııa) aýrýynyń birden eki jaǵdaıy tirkeldi.
Infektsııa Gabonǵa issapardan jáne Vetnamǵa saıahattan oralǵan qala turǵyndarynan anyqtaldy. Ulttyq qoǵamdyq densaýlyq saqtaý ortalyǵynyń málimetinshe, jyl basynan beri megapolıste osy qaýipti aýrýdyń syrttan kelýi tórtinshi ret tirkelip otyr.
— Patsıentterden bezgektiń eki túrli formasy — tropıkalyq jáne úshkúndik túrleri anyqtaldy. Tropıkalyq bezgek eń qaýipti bolyp sanalady: ýaqytyly emdelmese, ol mıdyń, baýyrdyń, búırektiń jáne tynys alý júıesiniń zaqymdanýyn qosa alǵanda, aýyr asqynýlarǵa, al keıbir jaǵdaılarda ólimge ákep soǵýy múmkin, — dep habarlady ortalyqtan.
Mamandardyń aıtýynsha, úshkúndik bezgek ádette jeńil ótedi, biraq onyń ózindik ereksheligi bar. Qozdyrǵysh aǵzada uzaq ýaqyt boıy saqtala alady, sondyqtan aýrý juqtyrǵannan keıin birneshe aı ótse de qaıtadan bas kóterýi múmkin.
— Jaǵdaılar zerthanalyq turǵydan rastaldy, patsıentter statsıonarda em qabyldap jatyr. Mamandar qajetti epıdemııaǵa qarsy is-sharalar keshenin júrgizip jatyr, — dep naqtylady ortalyqtan.
Mamandar bul ınfektsııanyń halyq arasynda taralý qaýpi joq ekenin málimdedi. Óıtkeni tirkelgen jaǵdaılar syrttan juǵyp kelgen. Bezgektiń juǵýy úshin ınfektsııalanǵan bezgek masasynyń shaǵýy qajet. Aýrý Anopheles tuqymdas masalardyń shaǵýy arqyly beriledi. Sonymen qatar turmystyq jaǵdaıda aýrý adamnan juqtyrý múmkin emes: ınfektsııa qol alysý, ydys-aıaq, tamaq, sý nemese aýa-tamshylary arqyly taralmaıdy.
Eske salaıyq, jazda ishek ınfektsııalary aýrýlarynyń jıileýine baılanysty dáriger keńes berdi.
