Ǵabıt Rasýlhan dzıýdodan jasóspirimder arasynda álem chempıony atandy
ASTANA. KAZINFORM – Qazaqstandyq dzıýdoshy Ǵabıt Rasýlhan Ekvadordyń Gýaıakıl qalasynda dzıýdodan jasóspirimder arasynda ótip jatqan álem chempıonatynda top jardy, dep habarlaıdy Qazaqstannyń dzıýdo federatsııasy.
60 kelige deıingi salmaq dárejesinde beldesken ol fınalda Kanada sportshysy Roman Semırozýmdy jeńdi. Sondaı-aq, ol fınalǵa deıin Aljır, Túrkııa, Ýkraına, Japonııa dzıýdoshylaryn jarys jolynan shyǵardy.
Sonymen qatar, el qorjynyna Ádiljan Nurbeken (-50 kg) men Adııa Janahmet (-40 kg) - kúmis, Bekarys Qudaıbergen (-50 kg) men Ahmet Baýbek (-60 kg) qola júldeni saldy.
Osylaısha, Qazaqstan quramasy jarystyń alǵashqy kúninde-aq 1 altyn, 2 kúmis jáne 2 qola júlde jeńip alyp, medal kestesinde kósh bastady.
Aıta keteıik, 23 tamyzǵa deıin jalǵasatyn álem birinshiligine 59 elden 457 jas tatamı sheberi qatysyp jatyr.
Osyǵan deıin Halyqaralyq dzıýdo federatsııasy (IJF) Majarstannyń Býdapesht qalasynda ótetin Grand Slam týrnırine qatysatyn sportshylardyń aldyn ala tizimin jarııalady.
