Ǵabıt Músirepov áleminiń ǵajaıyby ǵalamat mol - jazýshynyń 110 jyldyǵyna oraı ótkizilgen dóńgelek ústel

dep jazady "Egemen Qazaqstan" gazeti. Osynaý bekzat tulǵa kózden ketse kóńilden óshirer ýaqyt buıryǵyna bas shulǵıtyndar sa­­natyna jatpaıdy. Ózi de, sózi de asyl Ǵa­beńniń elin súıgen erek júregine, Alataýdaı abyroıdy syıǵyzǵan baıtaq omyraýyna qur­met­pen qa­rap súıiný de ýaqyt erkinen tysqary.

Zamandastary Ǵ.Músirepovti kórkem sóz­diń zergeri degen ataqqa birden-bir laıyqty sýretker dep baǵalaǵan-dy. Qazirgi urpaq úshin de Ǵabıt áleminiń ǵajaıyby ǵalamat mol. Munyń ózi klassık jazýshynyń bıylǵy 110 jyldyǵy tusynda aıǵaqtala túsýde. Jaqynda Almaty qalasynyń mádenıet bas­qarmasy jáne S.Muqanov pen Ǵ.Músire­pov­tiń memlekettik ádebı-memorıaldyq mura­jaı kesheni uıymdastyryp ótkizgen «Boıaýly sóz, áserli sóz, úndi sóz» atty dóńgelek ústelde de sulýlyq pen izgilikke qushtar Ǵabeńniń basty muraty ult rýhynyń ólmeýi bolǵandyǵy áńgimege altyn arqaý etip alyndy. Atalmysh murajaı kesheniniń dırektory Ádilǵazy Qaı­­­­­yrbekov, «Qazaq entsıklo­pe­dııa­synyń» bas redaktory Baýyrjan Jaqyp, M.Áýezov atyn­daǵy Ádebıet jáne óner ıns­tıtýtynyń bólim meńgerýshisi Serikqazy Qorabaı, Abaı atyn­da­ǵy QazUPÝ professory Temirhan Tebe­gen­uly, «Muqaǵalı» jýr­na­lynyń bas redaktory Batyq Májıtuly jáne basqalar Ǵabeń ǵıb­rattary jaıly ulaǵatty paıymdaryn ortaǵa saldy. Aqsaqal aqyn Myńbaı Rásh qyzyqty estelikter aıtty. «Ǵabıt Músirepov» entsıklopedııasyn shyǵarý jóninde bastalyp ketken jumystardy oraıymen úılestirý, jandandyrý jóninde pikir alysyldy.

Odan soń «Ǵajaıyp Ǵabeń» kitabynyń tusaýkeseri osy taǵylymdy jıynnyń kór­kin keltire tústi. Bul kitapqa arǵy-bergi qa­zaq aqyndarynyń ataqty sóz zergerine ár jy­l­darda, 1950 jyldan bergi 60 jyldyń uzyn yrǵasynda arnap jazǵan áralýan óleń-jyr­­­lary toptastyrylǵan eken. Kenen Ázirbaev, Ǵalı Ormanov, Ábdilda Tájibaev, Qalıjan Bekhojın, Qýandyq Shańǵytbaev, Syrbaı Máý­lenov, Ǵafý Qaıyrbekov, Erkesh Ibra­hım, Qadyr Myrza-Áli, Tumanbaı Moldaǵ­a­lı­ev, Farıza Ońǵarsynovalardan bastap Ǵa­be­ńe aq tilegin aqtarmaǵan aqyn joq sııaqty. Teginde, eń kóp óleń arnalǵan belgili tulǵa­lardyń biregeıi de Ǵabeń bolsa kerek. Mun­daǵy shyn júrek, shynaıy tilekten shyqqan jyrlar syrbaz sýretkerge degen halyq súı­is­penshiliginiń belgisindeı desek, qatelespespiz.

Ǵabeke, anda-sanda Sizdi kórem,

Sizdi kórsem, jomart bir kúzdi kórem.

Eliktep ózińizge esim ketip,

Kógendep aq qaǵazqa tizdim óleń.

Meıirimmen qaraıtyn Sizdi kórem,

Basqalar úmitterin úzdi menen.

Iá, bul tebirenisti shýmaqtardan Ǵabeń­niń Muqaǵalımen de muńdas bolyp, aqyn janyn tereń túsingeni baıqalady. Sonyń bir aıǵaǵy qazir Qarasazdaǵy Muqaǵalı mýzeı­in­de turǵan, qazaq jyrynyń pyraǵyna Ǵabeń syılaǵan altyn qalam.

Alyptar tobynyń asa kórnekti ókiline arnaǵan óleńderin aqyndar osy jıynda da oqydy. Ǵabeńniń qyzy Gúlnár Músirepova, jıeni Sáýle, inisiniń qyzy Janat Áshimqyzy saǵynyshqa toly júrekjardy perzenttik lebizderin bildirdi.