Premer-Mınıstrdiń burynǵy keńesshisi jańa qyzmetke taǵaıyndaldy
ASTANA. KAZINFORM - Ǵabıdolla Ospanqulov QR Syrtqy ister mınıstrligi Investıtsııa komıtetiniń tóraǵasy bolyp taǵaıyndaldy, dep habarlaıdy mınıstrliktiń baspasóz qyzmeti.
Ol 1981 jyly 13 shildede Ońtústik Qazaqstan oblysynda dúnıege kelgen. 2002 jyly Qazaq memlekettik zań ýnıversıtetin, 2007 jyly Qazaqstan-Reseı ýnıversıtetin jáne Bırmıngem ýnıversıtetin bitirgen.
Eńbek jolyn 1999 jyly «Eýrazııa Konsaltıng» JShS-te zańgerdiń kómekshisi retinde bastaǵan. 2002 jyldan 2010 jylǵa deıin QR Parlamenti Senatynda jáne QR Prezıdentiniń Parlamenttegi Ókildiginde túrli laýazymdarda qyzmet atqardy. 2010-2019 jyldary Ekibastuz qalasy ákiminiń jáne Batys Qazaqstan oblysy ákiminiń orynbasary laýazymynda jumys istedi, QR Bilim jáne ǵylym mınıstrliginde basshylyq qyzmetter atqardy.
2019 jyly «NurOtan» partııasynyń hatshysy boldy. 2019 jyldan 2020 jylǵa deıin QR Aqparat jáne qoǵamdyq damý vıtse-mınıstri, 2021-2024 jyldar aralyǵynda – QR Prezıdenti Ákimshiliginiń memlekettik ınspektory, Memlekettik baqylaý jáne aýmaqtyq uıymdastyrý jumysy bólimi meńgerýshisiniń orynbasary, meńgerýshisi. 2023 jyldan 2024 jylǵa deıin Qazaqstan Respýblıkasy Úkimeti Apparaty basshysynyń birinshi orynbasary qyzmetin atqardy.
QR Syrtqy ister mınıstrligi Investıtsııalar komıtetiniń tóraǵasy bolyp taǵaıyndalǵanǵa deıin Qazaqstan Respýblıkasy Premer-Mınıstriniń keńesshisi bolǵan.
Aǵylshyn tilin meńgergen.
