Ǵabdýllın: Nursultan Ábishulynyń kesimdi sóziniń arqasynda bostandyqqa shyqtym
ASTANA. QazAqparat - Bıgeldi Ǵabdýllın bostandyqqa shyqqany úshin QR Prezıdenti Nursultan Nazarbaevqa rızashylyǵyn bildirdi, dep habarlaıdy QazAqparat.
«Men Nursultan Ábishuly Nazarbaevqa rızashylyǵymdy bildirgim keledi. Nursultan Ábishulynyń sheshýshi sóziniń arqasynda men bostandyqqa shyǵyp otyrmyn. Qazaq ádebıetiniń maıtalmandary Ádbijámil Nurpeıisov, Oljas Súleımenov, Asanáli Áshimov, Dýlat Isabekov, Smaǵul Elýbaevtar qol qoıǵan úndeýdi qaperge alǵany úshin alǵysym sheksiz. Eń aldymen ózimniń dostaryma, Astana qalalyq máslıhatyndaǵy áriptesterimizge rızashylyǵymdy bildiremin. Qıyn sátte meni tastap ketpeı, tek materıaldyq jaǵynan ǵana emes, sonymen birge moraldyq turǵyda qoldaý kórsetken barlyq adamdarǵa rızamyn», - dedi Bıgeldi Ǵabdýllın sot zalynan bosap shyqqannan keıin BAQ ókilderine bergen suhbatynda.
Eske sala ketsek, keshe Astana qalalyq qylmystyq ister jónindegi mamandyrylǵan aýdanaralyq sotynda prokýror Álibek Aıtjanov «CentralAsiaMonitor» basylymynyń bas redaktory jáne «Radiotochka.kz» dırektory Bıgeldi Ǵabdýllındi óz kinásin moıyndaǵandyqtan bostandyqqa shyǵarýdy usynǵan bolatyn. Búgin sot Ǵabdýllınge 5 jylǵa bas bostandyǵyn shekteý úkimin shyǵardy. Múlki tárkilenbeıdi.
«Osyǵan baılanysty bes jylǵa deıin bas bostandyǵyn shekteý jazasyn belgileýdi suraımyn. Osy ýaqyttyń ishinde oǵan arnaıy organnyń ruqsatynsyz turaqty meken-jaıdy ózgertýge, shetelge shyǵýǵa, basqa jerlerge barýǵa, sondaı-aq buqaralyq sharalarǵa qatysýǵa bolmaıdy. Qamaýǵa ustaý sharasyn ózgertip, sot zalynan bosatýdy suraımyn»,- dedi prokýror Álibek Aıtjanov.
Aıt keteıik, buǵan deıin ótken otyrysta Bıgeldi Ǵabdýllınniń múlki jarııalanǵan bolatyn. CentralAsiaMonitor-dyń bas redaktory ári Radiotochka.kz dırektory Bıgeldi Ǵabdýllın Astana qalasy Almaty aýdandyq №2 sotynyń sanktsııasymen tutqynǵa alynǵan. Ol «Central Asia Monitor» jáne «Radiotochka.kz» buqaralyq aqparat quraldarynyń paıdasyna bıýdjettik qarjyny alý úshin bopsalaý áreketine bardy dep aıyptalǵan.
