Ǵabdýllın atyndaǵy mektepke kúrdeli jóndeý júrgizilýde - Aqmola oblysy
KÓKShETAÝ. QazAqparat - Aqmola oblysynda Málik Ǵabdýllın atyndaǵy jalpy bilim beretin orta mekteptiń ǵımaratyna kúrdeli jóndeý jumystary júrgizilýde, dep habarlaıdy QazAqparat tilshisi.
Zerendi selosyndaǵy ornalasqan bul bilim ordasynyń irgesi 1973 jyly qalanǵan. Sol sebepti, jarty ǵasyrǵa jýyq tarıhy bar eki qabatty ǵımaratqa kúrdeli jóndeý jumystary qajet bolatyn. Tipti, sońǵy jyldary mekteptiń tóbesinen sý sorǵalap aǵyp, oqýshylardyń bilim alýyna biraz qıynshylyqtar týǵyzdy. Osyǵan oraı oblys basshylyǵy mektepke kúrdeli jóndeý jumystaryn júrgizý úshin oblystyq bıýdjetten 300 mıllıon teńgeden astam qarjy bólýdi sheshedi. Onyń 150 mıllıon teńgesi bıylǵy jylǵa qarastyrylǵan. Bul qarjyǵa búgingi tańda mekteptiń shatyry, esik, terezeleri jáne edeni aýystyrylýda. Qalǵan qarjyǵa keler jyly jańa sportzalynyń qurylysy men bilim ordasynyń mańyn abattandyrý sharalary qarastyrylǵan. Qurylys jumystaryn merdiger «Eńbek-Kókshetaý» seriktestigi qolǵa alǵan.
«Tapsyrys berýshi retinde qurylys jumystarynyń sapaly júrgizilýin baqylap otyrmyz. Birinshi toqsannyń sońyna deıin negizgi jumystardy aıaqtap, ǵımaratty tapsyramyz. Keler jyly sportzaldyń qurylysy men abattandyrý jumystaryna kirisetin bolamyz», - dep atap ótti aýdandyq sáýlet, qurylys jáne qurylys bóliminiń basshysy Erjan Shákirjanov. 
Eske sala keteıik, atalmysh mektepte 300-den astam bala bilim alýda. Onyń 66-y Qarsaq, Qyzyl Kardon, Báıterek, Úlgili jáne Troıtsk sııaqty jaqyn mańdaǵy aýyldardan qatynap oqıdy.
