Gaagada ońshyldardyń mıtıngisi polıtsııamen qaqtyǵysqa ulasty
ASTANA. KAZINFORM — Senbi kúni Nıderlandynyń Gaaga qalasynda úkimettiń mıgratsııalyq saıasatyna qarsy jergilikti ońshyl uıymdardyń mıtıngisi ótti. Alaıda, shara qatty qaqtyǵystarǵa ulasyp, polıtsııa qatal kúsh qoldanýǵa májbúr boldy, dep habarlaıdy agenttiktiń menshikti tilshisi.
Ýltraońshyldardyń demonstratsııasy Gaagadaǵy Malıveld alańynda mıgranttarǵa baspana berý saıasatyna qarsy bastaldy. Biraq keıin ol zor janjaldarǵa jáne polıtsııamen qaqtyǵysqa ulasyp ketti. Nıderlandy polıtsııasy kóz ashytatyn gaz ben sý búrikkish quraldardy paıdalandy.
Sol ýaqytta narazylar Gaaga qalasynyń ortalyǵynda birneshe ret dúkenderdi tonap, tártipsizdik jasady. Polıtsııa tártipsizdikterge baılanysty birneshe adamdy ustaǵanyn habarlady, biraq naqty sany ázirge belgisiz.
— Qazir biz aqparat jınap jatyrmyz jáne búgin keshke resmı málimdeme jasaımyz, — dedi polıtsııa ókili.
Kóptegen ultshyldar qara kıim kıip, betperde taǵyp alǵan. Olar Malıveld aýdanynda polıtseılerge jáne polıtsııa kólikterine shabýyl jasap, taıaqtar, tastar, qaqpaqtar men bótelkeler laqtyrdy. Sondaı-aq olar tártip saqshylarynyń jylqylaryna shabýyldap, polıtsııa kóligin órtegen.
Jergilikti BAQ-tyń habarlaýynsha, demonstratsııany Zýtermer qalasynan kelgen Els atty belsendi uıymdastyrǵan. Ózin «Els Rehts» dep ataıtyn ol Gofundme platformasynda qarjy jınaý kampanııasyn júrgizip, mıtıngini ótkizý úshin 20 000 eýroǵa jýyq qarjy jınaǵan. Onyń ereýilge shaqyrýy áleýmettik jelilerde keń taralyp, kóp adam qatysqan.
Keıbir qatysýshy Malıveldke Gollandııa týymen jáne «Nıderlandyny, eń aldymen halqymyzdy qorǵańyzdar», «Nıderlandy baspana berý ortalyqtaryna qarsy» degen jazýlary bar plakattarmen kelgen. Keıbiri «Antıfaǵa — jol joq» degen jazýy bar jeıde kıgen.
Premer-mınıstr Dık Shoof X áleýmettik jelisinde «qorqynyshty ári oǵash zorlyq-zombylyq kórinisterin múlde qabyldaýǵa bolmaıdy» dep málimdedi.
— Tártipsizdikterge qatysqandardyń polıtseılerge shabýyl jasaýy, polıtsııa kólikteri men D66 partııasynyń keńsesin buzý — múlde qabyldaýǵa kelmeıtin is. Biz polıtsııa, arnaıy bólimder men qala basshysy Van Zanenniń áreketterin zor qurmetpen baǵalaımyz. Polıtsııa men prokýratýra kinálilerdi anyqtap, jaýapqa tartatynyna senimdimiz. Demonstratsııaǵa árdaıym oryn bar, biraq zorlyq-zombylyqqa jol joq, — dedi premer-mınıstr.
Ádilet mınıstri Foort van Osten de áleýmettik jelide jazba qaldyryp, polıtsııaǵa baǵyttalǵan bundaı zorlyq-zombylyq múlde qabyldanbaıtynyn jetkizdi.
— Demonstratsııa — Nıderlandydaǵy tamasha qubylys, biraq oǵan qatysýshylar bizdiń qyzmetkerlerimizge qol tıgizbesin! Olar bizdiń qaýipsizdigimizdi qamtamasyz etedi. Sondyqtan qala basshysy men polıtsııanyń nusqaýlaryn oryndańyzdar, — dep jazdy ol.
Budan buryn habarlanǵandaı, Nıderlandtyń Syrtqy ister mınıstri, tsentrıstik «Jańa qoǵamdyq kelisim» (NSC) partııasynyń ókili Kaspar Veldkamp Izraılge qarsy sanktsııalar jónindegi daýdan keıin otstavkaǵa ketti.