Gaaga konventsııasyn ratıfıkatsııalaý sheteldik azamattardy bala asyrap alýǵa belsendi tartý úrdisi emes - J. Túımebaev

Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń balalardy qorǵaý jáne balany sheteldik asyrap alýǵa qatysty yntymaqtastyq týraly konventsııaǵa qosylýy jáne ratıfıkatsııalaýy týraly» zań jobasyn talqylaý barysynda QR Bilim jáne ǵylym mınıstri Janseıit Túımebaev málim etti, dep habarlaıdy QazAqparat.

Mınıstrdiń aıtýynsha, búgingi kúni Parlament Májilisinde Neke jáne otbasy týraly kodeks jobasy talqylanyp jatyr. «Buny eskere otyryp, sheteldik bala asyrap alýǵa qatysty ulttyq zańnamada qajetti normalar engizý múmkindiginiń bar ekendigin atap ótý qajet. Ásirese, qujat boıynsha bala asyrap alý quqyǵy berilmeıtin sheteldik azamattardyń sanatyn taǵy da pysyqtaýǵa bolady. Máselen, bundaı sanatqa sottylyǵy bar tulǵalardy, dástúrli emes jynystyq baǵdardaǵy tulǵalardy, bala asyrap almaqshy jalǵyzbasty sheteldik azamattar, jasy elýden asqan sheteldikter, azamattyǵy joq tulǵalar, Qazaqstannyń elshilikteri men konsýldyq mekemeleri joq memleketterde turatyn azamattar jáne taǵy basqalardy jatqyzýǵa bolady. Sonymen birge, Kodeks jobasynda asyrap alynǵan balalardyń quqyqtary buzylǵan jaǵdaıda olardy qaıtarý tetikterin qarastyrý qajet», dedi J. Túımebaev.

Mınıstrdiń sózine qaraǵanda, Qazaqstannyń Balalardy qorǵaý jáne balany sheteldik asyrap alýǵa qatysty yntymaqtastyq týraly Gaaga konventsııasyna qosylýy bala asyrap alýǵa qatysty ulttyq zańnamany halyqaralyq normalarǵa sáıkestendirýge múmkindik beredi. «Jalpy, Gaaga konventsııasyn ratıfıkatsııalaý sheteldik azamattardy qazaqstandyq balalardy asyrap alýǵa belsendi tartý úrdisi emes. Kerisinshe, qujat sheteldik azamattar búginge deıin asyrap alǵan qazaqstandyq balalardyń quqyqtaryn qorǵaý jáne baqylaý máselesin órkenıetti sheshý joldaryn qamtıdy», dedi ol.