Gaaga konventsııasy sheteldik azamattar asyrap alǵan balalar quqyǵynyń qorǵalýyn órkenıetti jolmen sheshý bolyp tabylady - J. Túımebaev

Búgin QR Parlamenti Senatynyń jalpy otyrysynda «Balalardy qorǵaý jáne balany sheteldik asyrap alýǵa qatysty yntymaqtastyq týraly konventsııany ratıfıkatsııalaý týraly» zańdy talqylaý barysynda Bilim jáne ǵylym mınıstri Janseıit Túımebaev osylaı málim etti, dep habarlaıdy QazAqparat.

Mınıstrdiń aıtýynsha, osy ýaqytqa deıin qazaqstandyq balalardyń kópshiligin AQSh asyrap alsa, odan keıingi oryndarda Ispanııa, Belgııa, Germanııa sekildi memleketter tur. Al Qazaqstannyń qoldanystaǵy zańnamasyna sáıkes, sheteldikter asyrap alǵan balalar on segiz jasqa tolǵanǵa deıin Qazaqstannyń da azamaty bolyp qalatyny jaıynda arnaıy norma qamtylǵan. «Osyǵan oraı, Qazaqstan atalmysh balalarǵa qatysty qos azamattyqty moıyndaıdy. Sheteldikter asyrap alǵan bala kámelettik jasqa tolǵannan keıin óziniń turaqty turatyn memleketin tańdaıtyn bolady», dedi J. Túımebaev.

Onyń aıtýynsha, atalǵan Konventsııanyń maqsattarynyń biri balany qabyldaǵan memlekettiń asyrap alǵan bala quqyǵyn, asyrap alýshynyń balaǵa degen jaýapkershiligin, sondaı-aq asyrap alýshy ata-ana men bala arasyndaǵy quqyqtyq qarym-qatynasyn jáne balaǵa mura qaldyrý máselelerin qamtamasyz etedi. Qujattyń birqatar baptarynda halyqaralyq bala asyrap alý balanyń múddesine saı júrgizýdi qamtamasyz etý úshin qaýipsizdik sharalary aıqyndalǵan. «Bul jemqorlyqtyń jáne qarjylyq paıda boldyrmaý máselesine balanyń qorǵanshylyq jáne qamqorshylyq organdarynyń kózqarasyn eskerý bolyp tabylady. Konventsııany durys qoldaný úshin basqa memlekettermen kelisimshartar jasaý da qarastyrylǵan. Budan basqa, bala quqyqtaryn qorǵaý úshin qajetti quqyqtar belgilendi», dedi mınıstr.

Onyń aıtýynsha, bul konventsııany álemniń 76 memleketi ratıfıkatsııalaǵan. «Konventsııa zańnamanyń ulttyq quqyqtyq ókilettigin shektemeıdi. Osyǵan oraı, qujatty qabyldaý Qazaqstannyń qoldanystaǵy zańnamasyna ózgerister men tolyqtyrýlar engizýge qaıshy kelmeıdi.