Gaaga qalasynda qazaq bıshileri Qara jorǵa bıin pash etti
ASTANA. QazAqparat - Gaaga qalasynda shahar mýnıtsıpalıtetiniń uıymdastyrýymen jáne sheteldik dıplomatııalyq mıssııalardyń qoldaýymen altynshy halyqaralyq «Embassy Festival-2018» týrıstik festıvali ótip jatyr. Bıyl atalmysh sharaǵa Gollandııanyń ákimshilik qalasynda ornalasqan alpysqa tarta elshilik qatysýda, dep habarlaıdy QazAqparat tilshisi Nıderlandydaǵy Qazaqstan elshiliginiń Feısbýktegi paraqshasyna silteme jasap.
Jyl saıyn ótkiziletin festıval bul kúnde qalanyń ózindik qoltańbasyna, ereksheligine, órnegine aınalǵan. Al oǵan qatysýshy sheteldik mıssııalardyń sany jyl sanap artyp keledi. Festıvaldiń jyl saıynǵy baǵdarlamasyna tegin sheberlik sabaqtary, álemge áıgili ánshilerdiń óner kórsetýi, álemdik as máziriniń degýstatsııasy, pop, djaz, halyqtyq jáne klassıkalyq ánder enetin erekshe mýzykalyq baǵdarlama, ulttyq kostıýmdermen foto túsirý sharalary enedi.
Bıyl Almaty qalasynyń týrızm jáne syrtqy baılanys basqarmasynyń qoldaýymen Nıderlandydaǵy Qazaqstan elshiligi elimizdiń ulttyq pavılonyn qurdy.
Qazaqstandyq pavılon erekshe jınaqylyǵymen, estelik syılyqtarynyń kóptigimen, ulttyq taǵamdardyń dámdiligimen meımandar nazaryn ózine aýdartty. Pavılonda uıymdastyrylǵan sheberlik sabaǵy barysynda kóptegen meımandar qazaqtyń ulttyq taǵamdaryn, irimshikti ózderi daıyndap kórdi. Sazsyrnaı men dombyrany qolyna alyp, qazaqtyń shapany men bórkin kıip, máre-sáre boldy.
Festıvaldiń bas sahnasynda Qurmanǵazynyń, Dáýletkereı men Dınanyń kúıleri oryndalyp, áýezdi kúılerdiń jelisimen «Dombyra týraly ańyz» qoıylymy qoıyldy. «Kókjaılaý Astana» shyǵarmashylyq ujymynyń oryndaýyndaǵy Qara jorǵa kóptiń nazaryn aýdaryp, jınalǵan jurtshylyqtyń qoshemetine ıe boldy.
Týrıstik-aqparattyq ortalyqtyń ókilderi jınalǵan meımandarǵa Almaty týraly baıan etip, ony Qazaqstannyń basty týrıstik ortalyǵy retinde tanystyrdy. Jınalǵan qonaqtardyń kóbi jýyq arada Qazaqstanǵa týrıst retinde barýǵa nıet bildirdi.
Festıval sońynda qazaqstandyq pavılonnyń mańynda qazaq ártisteri men qonaqtardyń qatysýymen fleshmob uıymdastyryldy.
