G7 syrtqy ister mınıstrleri Izraıl men Palestınaǵa qatysty málimdeme jasady
«Úlken jetilik» elderiniń syrtqy ister mınıstrleri Izraıl men Gazadaǵy jaǵdaıǵa baılanysty ortaq málimdeme jasady, dep habarlaıdy Kazinform menshikti tilshisi.
AQSh Memlekettik departamenti jarııalaǵan málimdemede Kanada, Frantsııa, Germanııa, Italııa, Japonııa, Birikken Koroldik pen Amerıka Qurama Shtattarynyń syrtqy ister mınıstrleri tutqyndardy bosatyp, Gaza turǵyndaryna kóbirek gýmanıtarlyq kómek jetkize alý úshin soǵysqa úzilis jasaýdy quptaıtyny aıtylǵan.
Sondaı-aq G7 barlyq tutqyndy dereý jáne sózsiz bosatýǵa, janjal aýmaǵynan shet el azamattaryn shyǵarýdy jeńildetýge shaqyrdy.
Sonymen qatar «Úlken jetilik» Izraıl ózin jáne óz halqyn bıylǵy 7 qazandaǵy jaǵdaı qaıtalanbas úshin halyqaralyq quqyqqa sáıkes qorǵaı alatynyn atap ótti.
«G7 syrtqy ister mınıstrleri eki memlekettiń de bolýy úshin Palestına memleketin qurý qajet dep sanaıdy. Bul ızraıldiktermen qatar palestınalyqtarǵa da ádil, myqty jáne qaýipsiz qoǵamda ómir súrýge múmkindik beredi», — delingen málimdemede.
Qurama Shtattar men óńirdegi elderdiń, ásirese Katar men Mysyrdyń oq jaýdyrýdy toqtatýdy qamtamasyz etýdegi úlesi, sondaı-aq gýmanıtarlyq kómek jetkizýdi úılestirýde BUU qoldaýy atap ótildi.
G7 teńizdegi qaýipsizdiktiń mańyzdy ekenin aıtyp, barlyq tarapty halyqaralyq teńiz joldarymen jáne kommertsılyq kemelermen qorqytpaýǵa, sondaı-aq hýsıtterdi shabýyldy toqtatyp, bıyl 19 qarashada halyqaralyq sýlarda zańsyz basyp alynǵan «Galaxy Leader» kemesiniń ekıpajyn dereý bosatýǵa shaqyrdy.
