G7 sammıtine OpenAI, Anthropic jáne Google DeepMind basshylary qatysady
ASTANA. KAZINFORM — Jasandy ıntellekt salasyndaǵy jetekshi kompanııalardyń basshylary G7 elderiniń kóshbasshylarymen kezdesip, tehnologııanyń damý keleshegin, onyń álemdik ekonomıka men eńbek naryǵyna yqpalyn, sondaı-aq yqtımal táýekelderin talqylaıdy.
15-17 maýsym aralyǵynda Frantsııanyń Evıan-le-Ben qalasynda ótetin G7 sammıtine jasandy ıntellekt salasyndaǵy jetekshi kompanııalardyń basshylary qatysady. Sammıtke shaqyrylǵandar qatarynda Sem Altman, Darıo Amodeı jáne Demıs Hassabıs bar.
Bloomberg málimetinshe, bul shara jasandy ıntellekt ázirleýshi eń iri kompanııalardyń jetekshileri bir mezette jınalatyn sırek alańdardyń biri bolmaq. Bir-birimen básekeles bolǵanyna qaramastan, olar búkil salaǵa qatysty mańyzdy máselelerdi talqylaıdy.
G7 elderiniń kóshbasshylary tehnologııalyq sektor ókilderimen jasandy ıntellektiniń múmkindikteri, ony retteý joldary, sondaı-aq qoǵam men eńbek naryǵyna yqtımal áseri jóninde pikir almasýdy josparlap otyr.
«Úlken jetilikke» AQSh, Ulybrıtanııa, Germanııa, Frantsııa, Italııa, Kanada jáne Japonııa kiredi. Sonymen qatar birlestik jumysyna Eýropalyq Odaq ta qatysady.
Sarapshylardyń aıtýynsha, iri AI-kompanııalar basshylarynyń birlesken jarııa kezdesýleri óte sırek ótedi. Óıtkeni olar ozyq jasandy ıntellekt tehnologııalary men jańa tildik modelderdi ázirleýde ózara qatań básekelestik júrgizip keledi.
Eske sala keteıik, bıyl naýryz aıynda «Úlken jetilik» elderiniń qarjy mınıstrleri Halyqaralyq energetıkalyq agenttik úılestiretin rezervtegi munaı qorlaryn birlesip paıdalaný múmkindigin talqylady.
