G7 sammıtinde Taıaý Shyǵys, jasandy ıntellekt jáne balalar qaýipsizdigi talqylanyp jatyr
ASTANA. KAZINFORM – Frantsııanyń Evıan-le-Ben qalasynda ótip jatqan «Úlken jetilik» (G7) sammıtinde álemdik qaýipsizdik, Taıaý Shyǵystaǵy ahýal, jasandy ıntellekt jáne balalardy ınternettegi qaýipterden qorǵaý máseleleri talqylanýda.
Sammıtke G7 quramyndaǵy Kanada, Frantsııa, Germanııa, Italııa, Japonııa, Ulybrıtanııa, AQSh kóshbasshylary men Eýropalyq odaq ókilderi qatysyp jatyr.
Sharaǵa arnaıy shaqyrylǵan qonaqtar qatarynda Ýkraına prezıdenti Vladımır Zelenskıı, sondaı-aq Brazılııa, Mysyr, Úndistan, Kenııa, Ońtústik Koreıa, Qatar, Sırııa jáne Birikken Arab Ámirlikteriniń ókilderi bar.
Frantsııa prezıdenti Emmanıýel Makron sammıttiń ashylýynda geosaıası turaqsyzdyq jaǵdaıynda G7 elderiniń birligi erekshe mańyzdy ekenin aıtty.
«Búginde álem buryn-sońdy bolmaǵan syn-qaterlermen betpe-bet kelip otyr. Osyndaı jaǵdaıda demokratııalyq memleketterdiń ózara úılesimdi áreketi men ortaq ustanymy jahandyq turaqtylyqty saqtaýdyń mańyzdy faktory bolyp qala beredi. Sondyqtan halyqaralyq qaýipsizdik, ekonomıkalyq turaqtylyq jáne tehnologııalyq damý máselelerinde yntymaqtastyqty kúsheıtý qajet», – dedi Emmanıýel Makron.
Sammıt barysynda AQSh prezıdenti Donald Tramp Iranmen jaqynda jarııalanǵan kelisimniń egjeı-tegjeıin tanystyrdy. Bul másele eýropalyq kóshbasshylar arasynda qyzý pikirtalas týdyrdy. Buǵan deıin Eýroodaq elderiniń basym bóligi AQSh pen Iran arasyndaǵy ýaqytsha bitim jónindegi aldyn ala kelisimdi qoldaǵan bolatyn.
Kezdesýde sondaı-aq jahandyq ekonomıka, mańyzdy mıneraldardy jetkizý tizbeginiń turaqtylyǵy, tsıfrlyq qaýipsizdik jáne balalardy ınternettegi qaýipterden qorǵaý máseleleri qarastyrylýda.
Sammıt qatysýshylary 2026 jylǵy fýtboldan álem chempıonatyn da nazardan tys qaldyrǵan joq. Germanııa kantsleri Frıdrıh Merts AQSh prezıdenti Donald Trampqa týǵan kúnine oraı Germanııa quramasynyń «Donald Trump» jáne «47» degen jazýy bar jeıdesin syıǵa tartty.
Jeneva kóliniń jaǵasyndaǵy Royal Ermitage qonaqúıinde ótip jatqan sammıt qaýipsizdik sharalary kúsheıtilgen jaǵdaıda uıymdastyrylýda. Úsh kúnge sozylatyn kezdesýdiń qorytyndysy boıynsha G7 elderiniń ortaq ustanymdaryn qamtıtyn qorytyndy kommıýnıke qabyldanady dep kútilýde.
