G7 Izraılge qoldaý bildirip, Irandy Taıaý Shyǵystaǵy basty qaýip kózi retinde atady
VAShINGTON. KAZINFORM — «Úlken jetilik» elderi dúısenbi kúni keshke jarııalaǵan málimdemede Izraılge qoldaý bildirip, Irandy Taıaý Shyǵystaǵy turaqsyzdyq kózi dep atady. G7 kóshbasshylary óńirdegi qaqtyǵysty báseńdetýge shaqyrdy, dep jazdy Reuters agenttigi.
Juma kúni Izraıl Iranǵa áýe shabýylyn jasap, bul eki el arasyndaǵy ashyq qaqtyǵysqa ulasty. Taıaý Shyǵystaǵy jaǵdaıdy odan ári shıelenise tústi. Óńir qazan aıynda Izraıldiń Gazadaǵy áskerı operatsııasynan beri onsyz da qatty alańdaýly bolatyn.
— Biz Izraıldiń ózin qorǵaýǵa quqyǵy bar ekenin rastaımyz. Izraıl qaýipsizdigin qoldaıtynymyzdy taǵy da málimdeımiz. Iran — aımaqtaǵy basty turaqsyzdyq pen terrorızm kózi. Iran eshqashan ıadrolyq qarýǵa ıe bolmaýy tıis, — dep atap ótti G7.
Izraıl juma kúni Iranǵa qarsy shabýyldy Tegerannyń ıadrolyq qarý jasaýyna jol bermeý maqsatynda aldyn ala jasalǵan soqqy dep túsindirdi. Sodan beri eki tarap ózara shabýyldaryn jalǵastyryp keledi. Iran resmı ókilderi 220-dan astam adamnyń qaza tapqanyn habarlady, olardyń basym bóligi — beıbit turǵyndar. Izraıl de 24 beıbit turǵyny qaza tapqanyn rastady.
Iran ıadrolyq qarýǵa umtylatynyn joqqa shyǵaryp, beıbit maqsattaǵy ıadrolyq tehnologııany damytýǵa quqyly ekenin aıtady. Ol ıAdrolyq qarýdy taratpaý týraly shartqa (ıAQTSh) qatysýshy memleket.
Izraıl — ıAdrolyq qarýǵa tyıym salý týraly shartqa qosylmaǵan jalǵyz Taıaý Shyǵys eli jáne ıadrolyq qarýy bar memleket retinde keńinen tanylǵan. Alaıda Izraıl bul aqparatty resmı túrde ne rastamaıdy, ne joqqa shyǵarmaıdy.
Prezıdent Donald Tramp Taıaý Shyǵystaǵy shıeleniske baılanysty Kanadadaǵy G7 sammıtinen erte ketip, Vashıngtonǵa oralýdy josparlady. AQSh ázirge Izraıldiń Iranǵa jasaǵan shabýyldaryna esh qatysy joq ekenin málimdedi. Biraq Tramp juma kúni AQSh bul shabýyldar týraly aldyn ala bilgenin aıtty.
Vashıngton Tegeranǵa AQSh múddelerine nemese qyzmetkerlerine shabýyl jasamaý týraly eskertý jasady.
— Iran daǵdarysyn retteý Taıaý Shyǵystaǵy jahandyq qaqtyǵystardy, sonyń ishinde Gazadaǵy soǵysty toqtatýǵa jol ashýy tıis, — delingen G7 málimdemesinde.
Onda sonymen qatar, energetıkalyq naryqtaǵy turaqtylyqty saqtaý úshin úılesimdi jumys júrgizýge daıyn ekeni de aıtylǵan.
Dúısenbi kúni Izraıl Iran memlekettik telearnasynyń ǵımaratyna soqqy jasady. Al Tramp áleýmettik jelide «barlyq adam Tegerannan dereý evakýatsııalanýy kerek» degen jazba jarııalady.
Sol kúni AQSh Memlekettik hatshysy Marko Rýbıo Izraıl men Iran arasyndaǵy qaqtyǵysqa baılanysty Ulybrıtanııa, Frantsııa jáne EO-daǵy áriptesterimen telefon arqyly sóılesti.
AQSh Tramptyń Iranmen ıadrolyq kelisimge qol jetkizýge umtylysy jalǵasyp jatqanyn rastady.
Al Iran tarapy Izraıl soqqylarynan keıin ıAdrolyq qarý taratpaý kelisiminen shyǵamyz dep qorqytty.