G7 elderi Orta Azııa ınfraqurylymyna 200 mlrd dollar ınvestıtsııa quımaq, qarjynyń deni Qazaqstanǵa bólinedi

ASTANA. KAZINFORM – Syrtqy ister mınıstriniń orynbasary Nazıra Nurbaeva «Jahandyq ınfraqurylym jáne ınvestıtsııalyq seriktestik» baǵdarlamasynyń AQSh-tyń arnaıy úılestirýshisiniń mindetin atqarýshy Helaına Matsamen kezdesti.

Kezdesýde taraptar kólik-logıstıka, taza energııa, aýyl sharýashylyǵy ónimderin, sırek jer metaldaryn óndirý jáne óńdeý salalaryndaǵy jobalarǵa ınvestıtsııa salý múmkindikterin talqylady.

G7 «Jahandyq ınfraqurylym jáne ınvestıtsııalyq seriktestik» baǵdarlamasy damýshy elderdegi ınfraqurylymdyq jobalarǵa 2027 jylǵa qaraı 600 mıllıard AQSh dollaryn ınvestıtsııa salýdy kózdeıdi.

Suhbat barysynda N.Nurbaeva Qazaqstannyń kólik ınfraqurylymyn, onyń ishinde Aqtaý jáne Quryq teńiz porttary arqyly damytý, taza energııa óndirý, mańyzdy paıdaly qazbalar men aýyl sharýashylyǵy ónimderin óndirý salalaryndaǵy jobalardy iske asyrý perspektıvalary týraly aıtyp berdi. Mınıstrdiń orynbasary Ortalyq Azııa óńiriniń osy salalardaǵy uzaq merzimdi seriktestik úshin zor áleýeti bar ekenin atap ótip, Qazaqstannyń ortaq maqsattarǵa jetý úshin AQSh-pen yntymaqtasýǵa daıyn ekenin bildirdi.

Óz kezeginde H.Matsa «Úlken jetilik» elderi Ortalyq Azııadaǵy ınfraqurylymdyq jobalarǵa 200 mıllıard AQSh dollarǵa deıin ınvestıtsııa salýǵa daıyn ekenin jáne mundaı jobalardy júzege asyrýdyń negizgi baǵyttarynyń biri – Qazaqstan ekenin atap ótti. Baǵdarlamanyń negizgi maqsaty – Eýropalyq naryqtarǵa odan ári shyǵý arqyly Ortalyq Azııa elderi arasyndaǵy saýda qatynastaryn keńeıtý arqyly álemdegi azyq-túlik jáne energetıkalyq qaýipsizdikti qamtamasyz etý úshin jetkizý tizbegin nyǵaıtý jáne ártaraptandyrý.

Kezdesý sońynda taraptar mańyzdy ınfraqurylymdyq jobalardy júzege asyrý jáne ekonomıkalyq baılanystardy nyǵaıtý úshin taraptar arasyndaǵy yntymaqtastyqty damytýǵa kelisti.