G7 elderi munaı qorynan 100 mln barreldi naryqqa shyǵarady
ASTANA. KAZINFORM — «Úlken jetilik» (G7) elderi álemdik energetıka naryǵyn turaqtandyrý maqsatynda strategııalyq qorlaryndaǵy 100 mıllıon barrel munaı men munaı ónimderin birlesip naryqqa shyǵarýǵa kelisti. Munaı men munaı ónimderin jetkizý jaqyn arada bastalyp, 4 aıǵa sozylady, dep habarlaıdy VBC.
Bul sheshim týraly Frantsııa prezıdenti Emmanıýel Makron álemdik energetıka naryǵyndaǵy jaǵdaıǵa arnalǵan G7 kóshbasshylarynyń onlaın kezdesýinen keıin málimdedi. Strategııalyq qorlardy bosatý úderisin Halyqaralyq energetıkalyq agenttik (HEA) úılestiredi.
Dızel otynynyń edáýir bóligi alǵashqy 20 kúnde naryqqa shyǵarylmaq. Sonymen qatar G7 elderi munaı óńdeý zaýyttaryndaǵy tehnıkalyq qyzmet kórsetý jumystaryn júrgizý kestesin ózara kelisýge ýaǵdalasty. Bul olardyń óndiristik qýatynyń bir mezgilde tómendeýine jol bermeýge múmkindik beredi. Qajet bolǵan jaǵdaıda kásiporyndardyń júktemesin ýaqytsha arttyrý kózdelip otyr.
G7 kóshbasshylary munaı óńdeý qýaty joǵary elderdi munaı ónimderin, ásirese dızel otynyn óndirý kólemin arttyrýǵa shaqyrdy.
Budan bólek, top elderi G7 memleketteri arasynda energetıkalyq resýrstar men munaı ónimderin eksporttaýǵa shekteý qoımaý nıetin rastady. Sondaı-aq basqa óndirýshi elderdi de osyndaı sharalardan bas tartýǵa úndedi. Kezdesýge qatysýshylardyń pikirinshe, bul álemdik energetıka naryǵyna túsetin qosymsha qysymdy azaıtýǵa múmkindik beredi.
Buǵan deıin AQSh prezıdenti Donald Tramp Eýropa elderi óz qorlaryndaǵy dızel otynynyń edáýir kólemin naryqqa shyǵarýǵa keliskenin aıtqan edi. Onyń sózinshe, bul úderis dereý bastalýǵa tıis.
G7 bul sheshimdi otyn baǵasynyń ósýi jáne álemdik jetkizilimderdiń turaqtylyǵyna qatysty alańdaýshylyq kúsheıgen tusta qabyldady. «Úlken jetilik» kóshbasshylary HEA-ǵa qabyldanǵan sharalardyń energetıkalyq qaýipsizdik pen naryqtaǵy jaǵdaıǵa yqpalyn baqylaýdy tapsyrdy.
Aıta keteıik, 2 qazan kúni saýda-sattyq barysynda munaıdyń álemdik baǵasy azdap ósti.
