G20 sammıtinde álemdik ekonomıkanyń ósýin yntalandyrý jónindegi is-áreket jospary qabyldanady
BEIJІŃ. QazAqparat - Hanchjoý qalasynda G20 sammıtinde álemdik ekonomıkanyń ornyqty jáne teńgerimdi ósimin yntalandyrý jónindegi is-áreket josparyn qabyldaý josparlanýda.
Bul týraly búgin brıfıng barysynda Qytaı Halyq Banki tóraǵasynyń orynbasary I Gan (Yi Gang) málimdedi.
«Sammıttiń tórt mańyzdy taqyryby, birinshiden, álemdik ekonomıkanyń ornyqty jáne teńgerimdi ósimin yntalandyrý. Ekinshiden, halyqaralyq qarjy sáýletin jetildirý, úshinshiden, qarjy sektory reformalaryn alǵa jyljytý, tórtinshiden, ınklıýzıvti qarjylardy damytý (...) Biz Hanchjoý Іs-áreket josparymen jumys júrgizýdemiz. Onda joǵaryda kórsetilgen mindetterdi, birinshi kezekte, álemdik ekonomıka ósimin ornyqty jáne teńgerimdi yntalandyrýdy sheshý boıynsha naqty sharalar jazylǵan. Sondaı-aq G20 kóshbasshylarynyń deklaratsııasymen jumys istep jatyrmyz», - dedi ol.
I Gan 2016 jylǵy 1 qazannan bastap qytaı ıýani arnaıy alys-beris quqyqtary esebine resmı engiziletinin eske saldy.
Eske salsaq, 2015 jylǵy 1 jeltoqsannan bastap «jıyrmalyqqa» tóraǵalyq Túrkııadan Qytaıǵa ótti. «Innovatsııalyq, kináratsyz, ózara baılanysty jáne ınklıýzıvti álemdik ekonomıka qurý» taqyrybyndaǵy sammıt Hanchjoý qalasynda 4-5 qyrkúıekte ótedi.
QHR tóraǵasy Sı Tszınpın QR Prezıdenti N. Nazarbaevty alda ótetin G20 sammıtine qatysýǵa shaqyrdy. Bul QR ókilderine «úlken jıyrmalyq» aıasynda sharalardyń jyldyq kestesine qatysýǵa múmkindik beredi.
