G20-nyń Qytaıdan basqa elderi jahandyq teńgerimsizdikti azaıtýǵa kelisti
ASTANA. KAZINFORM – Seısenbi kúni Qytaıdan basqa «Úlken jıyrmalyq» elderiniń qarjy vedomstvolary basshylary jahandyq saýda teńgerimsizdigin azaıtý úshin naryqtyq emes sharalardan bas tartýdyń mańyzdylyǵyna qatysty ortaq pikirge keldi. Bul týraly Kyodo News jazdy.
– Biz elder teńgerimsizdikti kúsheıtetin naryqtyq emes saıasat pen tájirıbeni joıý úshin sharalar qabyldaýy kerek degen pikirdemiz, – delingen Soltústik Karolına shtatynyń Ashvıll qalasynda ótken eki kúndik kezdesýdiń qorytyndysy boıynsha jasalǵan G20 tóraǵasynyń málimdemesinde.
Málimdemege sáıkes, qarjy mınıstrleri men ortalyq bank basshylary, ásirese syrtqy sektorda shamadan tys ári uzaq ýaqyt boıy profıtsıt qalyptasqan elder «ishki tutynýdy shekteıtin jáne ekonomıkalyq ósimniń eksportqa shamadan tys táýeldi bolýyna ákeletin burmalaýshylyqtardy joıýy tıis» ekenin rastady.
G20 elderiniń qarjy basshylary valıýta baǵamdary ekonomıkanyń irgeli kórsetkishterin kórsetýi tıis degen ustanymǵa adaldyǵyn bildirdi.
Kezdesý álemniń kóptegen úkimeti uzaqmerzimdi oblıgatsııalardyń kiristiligin baqylaýǵa tyrysyp jatqan jáne AQSh pen Izraıldiń Iranǵa qarsy soǵysynyń jaqyn arada aıaqtalatynyna qatysty aıqyn belgi baıqalmaǵan tusta ótti.
– Jyldamdyqqa kelsek, biz belgisizdikke az ýaqyt jumsalyp, ınvestıtsııaǵa, ekonomıkalyq ósimge jáne naryqtarǵa qol jetkizýge kóbirek kóńil bólingenin qalaımyz, – dedi AQSh Qarjy mınıstri Skott Bessent damýshy ekonomıkalardaǵy memlekettik qaryz máselesine arnalǵan sessııanyń ashylýynda.
Aqpan aıynyń sońynda AQSh pen Izraıl bastaǵan soǵys álemdik energııa baǵasynyń ósýine jáne jetkizý tizbeginiń buzylýyna ákeldi. Sonyń saldarynan ınflıatsııa qaıta údeı bastady, al saıasatkerler men ınvestorlar qaryz alý qunynyń ósýine alańdap otyr.
Álemdik oblıgatsııalar naryǵyndaǵy satylym da kúsheıdi. Seısenbi kúni Japonııanyń 10 jyldyq memlekettik oblıgatsııalarynyń kiristiligi 1996 jyldan beri alǵash ret 3 paıyzǵa jetti.
G20 qarjy mınıstrleriniń kezdesýi AQSh Prezıdenti Donald Tramp jeltoqsanda Florıdada ótkizetin sammıtke daıyndyq aıasynda uıymdastyryldy. Tramp sammıtte AQSh ekonomıkasynyń qýatyn kórsetýdi kózdep otyr.
Talqylaýdyń ekinshi kúni qarjy vedomstvolarynyń basshylary jahandyq saýda teńgerimsizdigi máselesin, sonyń ishinde Qytaıdaǵy óndiristik qýattyń burynnan qalyptasqan artyq kólemin qarastyrdy.
Alaıda Qytaı qomaqty memlekettik sýbsıdııa alatyn kompanııalardyń arzan taýarlarymen álemdik naryqty toltyryp jatyr degen Batys elderiniń synyn únemi joqqa shyǵaryp keledi.
Bastapqyda AQSh eki kúndik kelissózderden keıin birlesken kommıýnıke jarııalaýdy josparlaǵan.
Alaıda Bessenttiń aıtýynsha, Qytaıdyń qarsylyǵyna baılanysty taraptar jahandyq ekonomıkalyq teńgerimsizdikke qatysty tujyrym boıynsha ortaq kelisimge kele almady.
Eske sala ketsek, byltyr kúzde Tramp 2026 jyly Maıamı qalasynda G20 sammıti ótetinin málimdegen. Sondaı-aq 25 tamyz kúni Astanaǵa kelgen AQSh kongressmeni Djeıson Smıt Tramptyń Toqaevty G20 sammıtine qatysý úshin Maıamıde kútetinin jetkizdi.
