G20: Qytaı, AQSh jáne Reseı jetekshilerinsiz ótetin sammıt

ASTANA. KAZINFORM — Iohannesbýrgte ótetin aldaǵy G20 sammıtine Qytaı tóraǵasy Sı Tszınpın emes, premer-mınıstr Lı Tsıan qatysady, dep habarlaıdy DW aqparat agenttigi.  

Qytaı Syrtqy ister mınıstrligi bul týraly 13 qarashada habarlady.

— QHR Memlekettik keńesiniń premer-mınıstri Lı Tsıan Ońtústik Afrıka úkimetiniń shaqyrýymen 21-23 qarasha aralyǵynda Iohannesbýrgte ótetin «Úlken jıyrmalyqtyń» 20-shy sammıtine qatysady, — delingen Syrtqy ister mınıstrliginiń málimdemesinde. 

Qujatta sondaı-aq Lı Tsıannyń buǵan deıin 17-18 qarashada Máskeýde ótetin ShYU úkimet basshylary keńesiniń otyrysyna qatysatyny jáne 19-20 qarashada Zambııaǵa saparlaıtyny aıtylǵan.

Lı Tsıan 2023 jyly Nıý-Delıde ótken G20 sammıtine Qytaı atynan qatysqan bolatyn. Aldaǵy kezdesý 2008 jyldan beri úsh iri múshe — AQSh, Qytaı jáne Reseıdiń kóshbasshylarynyń bip ýaqytta qatyspaıtyn alǵashqy kezdesý bolmaq.

AQSh prezıdenti Donald Tramp shilde aıynda Ońtústik Afrıkaǵa barmaıtynyn aıtyp, eldiń «óte nashar» saıasat júrgizip jatqanyn málimdegen bolatyn. Keıinirek ol AQSh sammıtke tipti qatyspaıtynyn habarlady.

Reseı prezıdentiniń baspasóz hatshysy Dmıtrıı Peskov Vladımır Pýtınniń is-sharaǵa jeke qatysýdy josparlamaǵanyn, biraq Reseıdiń «qadirli deńgeıde» usynylatynyn rastady. BAQ málimetinshe, Ońtústik Afrıka Respýblıkasyna Máskeý atynan Prezıdent ákimshiligi basshysynyń orynbasary Maksım Oreshkın barady.

Buǵan deıin AQSh prezıdenti Donald Tramp 2026 jyldyń basynda QHR tóraǵasy Sı Tszınpınmen kezdesý úshin Qytaıǵa resmı saparmen barýy múmkin ekenin jazǵan bolatynbyz.