G20 Hanchjoý sammıti G-Global jobasynyń ózektiligin kórsetti - Úndistandyq BAQ
HANChJOÝ. QazAqparat - G20 Hanchjoý sammıti G-Global bastamasyn ary qaraı damytý, sondaı-aq ony naqty saıasat quralyna jáne ózara qarym-qatynastyń tájirıbelik alańyna aınaldyrý qajettigin kórsetti.
G20 sammıti barysynda «QazAqparat» tilshisine bergen suhbattarynda Úndistan jýrnalısteri osyndaı pikirlerimen bólisti.
«QR Prezıdenti Nursultan Nazarbaevtyń G20 sammıtine qatysýy Sizderdiń memlekettiń jáne el prezıdentiniń álemdik arenadaǵy joǵary bedelin kórsetip otyr. N. Nazarbaev baıandama jasap, onda jahandyq ekonomıkalyq máselelerdi sheshýdiń ózindik joldaryn usyndy. Onyń ishinde Prezıdent G-Global aıasynda G20 pen damýshy elder arasynda suhbat ortalyǵyn qurýdy usyndy. Bul ıdeıa ómirde óziniń qoldanylýyn tabatynyna senimdimin, sebebi qazirgi jaǵdaı men ahýal jahandyq máselelerdi sheshýde budan da kóp memleketterdiń tartylýyn talap etip otyr», - deıdi «The Hindu» gazetiniń tilshisi Atýl Anedja.
Onyń sózinshe, G-Global aqparattyq-kommýnıkatsııalyq alańnan álem memleketteriniń suhbat platformasyna aınalatyny sózsiz, oǵan Azııadaǵy ózara yqpaldastyq jáne senim sharalary jónindegi keńes (AÓSShK) bastamalarynyń damý tájirıbesi dálel bola alady.
«N. Nazarbaev AÓSShK qurý týraly ıdeıasyn 1992 jyly jarııalady, kóp uzamaı, 2002 jyly keńestiń birinshi sammıti boldy. 2014 jyly Shanhaıda AÓSShK-niń 4-shi sammıti óte sátti ótti. Qazir uıym damyp jatyr jáne onyń álemdegi bedeli artýda. Osyǵan qarap-aq, G-Global damý bastamalarynyń ary qaraı órken jaıatyndyǵyna jáne ol naqty saıasat quraldaryna, ózara qarym-qatynastyń tájirıbelik alańyna aınalatynyna kúmán joq», - dep atap ótti A.Anedja.
«Hindustan Times» basylymy Beıjiń bıýrosynyń tilshisi Sýtırto Patronobıstiń pikirinshe, Qytaıdyń G20 sammıtine damýshy elderdiń basshylaryn kóptep shaqyrýy - álemdik arenada meılinshe joǵary deńgeıde qoldaý tabýyn kózdeýi.
«Qytaı, bylaı alyp qaraǵanda, G20 sammıtiniń aıasyn keńeıtti jáne álemdik problemalardy sheshýge damýshy elderdi tartty. Bul óte mańyzdy. Mysaly, Úndistan, halyq sanyna jáne ekonomıkadaǵy áleýetine qaramastan, osyndaı iri forýmdarǵa qatysýǵa kóp jyldar boıy múmkindigi bolmaı keldi. Menińshe, óz kóshbasshylarynyń osyndaı forýmdarda qatysýy arqyly damýshy elderde jahandyq sheshimderdi jasaýǵa naqty qol jetkizip otyr. Osy turǵyda, Hanchjoý sammıti Qazaqstan Prezıdenti bastamalarynyń G-Global odan ári damytýda ózektiligin kórsetti», - dedi ol.
Eske sala keteıik, N. Nazarbaev QHR Tóraǵasy Sı Tszınpınniń shaqyrtýymen 4-5 qyrkúıekte G20 sammıtine qatysqan bolatyn. Hanchjoýda ótken forým barysynda Memleket basshysy baıandama jasady. Onda Elbasy jahandyq ekonomıkalyq máselelerdi sheshýdiń joldaryn usynǵan bolatyn.
