G20 elderindegi mıllıarderlerdiń baılyǵy bir jylda 2,2 trln dollarǵa ósti – Oxfam

ASTANA. KAZINFORM – Sońǵy bir jylda G20 elderindegi mıllıarderlerdiń jıyntyq baılyǵy 16,5 paıyzǵa ósip, 15,6 trln dollarǵa jetti. Bul týraly Oxfam halyqaralyq qaıyrymdylyq uıymy Forbes deregine silteme jasap málimdedi, dep jazady DW.

Uıymnyń esebinshe, álemde kedeılik sheginen tómen ómir súrip jatqan 3,8 mlrd adamǵa (Dúnıejúzilik bank bul shekti adam basyna táýligine 8,3 dollardan tómen tabys retinde anyqtaıdy) kómektesý úshin shamamen 1,65 trln dollar jetkilikti.

G20 sammıti 22 qarashada Ońtústik Afrıka Respýblıkasynda bastalar aldynda Oxfam Germanııa kantsleri Frıdrıh Merts pen ózge de álem lıderlerin tómen tabysty elderge qoldaýdy arttyrýǵa, sondaı-aq sýperbaı adamdarǵa salyqty kóbeıtýge shaqyrdy.

Oxfam-nyń áleýmettik ádildik bóliminiń basshysy Tobıas Haýshıld ósip kele jatqan teńsizdikti «adamzatqa eleýli qaýip» dep sıpattady.

«Álemniń ár túkpirindegi ósip jatqan teńsizdik adamzatqa qater tóndirip otyr. Ol mıllıondaǵan adamdy ekonomıkalyq qıyndyqqa tireıdi, saıası bólinýdi kúsheıtedi jáne demokratııanyń álsireýine ákeledi. Memleketter damý jolyndaǵy elderge kómekti qysqartyp jatqanda, sýperbaı adamdardyń áli de tıisinshe salyq tólemeýi – múlde qabyldaýǵa bolmaıtyn jaǵdaı», – dedi ol.

Buǵan deıin Eýroodaqta balalardyń 25 paıyzy kedeılik sheginde ómir súrip jatqany habarlanǵan bolatyn.