Ǵ.Mutanov: Elbasy jahandyq daǵdarystan shyǵýdyń 5 naqty baǵytyn aıqyndap berdi
ASTANA. QazAqparat - Elbasy Nursultan Nazarbaev jahandyq daǵdarystan shyǵýdyń 5 naqty baǵytyn aıqyndap berdi. Bul pikirdi búgin QR Prezıdenti N.Nazarbaev «Qazaqstan jańa jahandyq naqty ahýalda: ósim, reformalar jáne damý» atty Joldaýyn jarııa etkennen keıin Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov bildirdi.
«Bıylǵy Joldaýdyń ereksheligi jahandyq daǵdarysty jaǵdaılarǵa baılanysty Elbasy atalǵan qıyndyqtardan shyǵýdyń naqty 5 baǵytyn aıqyndap berýinde boldy. Al bizder, bilim salasynyń mamandary úshin eń mańyzdysy adam kapıtalyna ınvestıtsııa salý, adam kapıtalyn damytý ekendigi sózsiz. Biz adam kapıtalyn damytý arqyly Qazaqstannyń bolashaǵyn jarqyn qylamyz», - dedi ýnıversıtet rektory.
Onyń atap ótýinshe, Memleket basshysy búgingi Joldaýynda áleýmettik saladaǵy jańa saıasat ázirleý isine de basa nazar aýdardy. Al, áleýmettik saladaǵy jańa saıasattyń negizi adam kapıtalyn damytý ekendigi sózsiz.
«Elbasy óz sózinde bilim berý salasyna eshqandaı qarjylyq qysqartý bolmaıtyndyǵyn, qoldaý kórsetile beretindigin aıtty. Bul bilim salasynda qyzmet atqaratyn barlyq qyzmetkerler, muǵalimder, oqytýshylar úshin qýanarlyq jaǵdaı. Árıne, bul Elbasynyń kóregendigi, strategııalyq baǵyttaǵy jumystardy sheshýdegi eń úzdik usynysynyń biri dep sanaımyn. Óıtkeni, adam kapıtalyn damytý arqyly barlyq daǵdarysty sheshe alamyz», - dedi ol.
