G.Markestiń «Júz jyldyq jalǵyzdyq» romanynyń qoljazbasy satyldy
ASTANA. QazAqparat - Ádebıet boıynsha Nobel syılyǵynyń laýreaty jáne «Júz jyldyq jalǵyzdyq» romanynyń avtory Gabrıel Garsıa Markestiń muraǵatyn Ostın qalasyndaǵy Tehas shtatynyń ýnıversıteti satyp aldy, dep jazady VVS.
Al, Kolýmbııanyń Mádenıet mınıstri Marııa Garses bul kelisimge ókinish bildirgen. «Muraǵatty satyp, el qundy dúnıeden aıyryldy», - degen ol. Al, Amerıkalyq ýnıversıtetke muraǵatty satqan jazýshynyń týystary bolsa, Kolýmbııa bıligi Markestiń ádebı murasyna suraý salmaǵanyn alǵa tartqan.
Garrı Renson atyndaǵy ýnıversıtettiń zertteý ortalyǵynyń ókili muraǵat uly jazýshy ómiriniń jarty ǵasyrdan astam ýaqytyn qamtıtynyn aıtqan. Ýnıversıtet qol jetkizgen kollektsııaǵa jazýshynyń tanymal romandarynyń jáne ózge de kitaptarynyń qoljazbasy, eki myńnan astam hat, sonyń ishinde Grem Grın jáne Karlos Fýenteske jazǵan hattary, Markestiń Nobel syılyǵyn alǵandaǵy sózi, sondaı-aq jazýshynyń jazý mashınkasy men kompıýteri engen.
Sondaı-aq, muraǵatta jazýshy qoljazbalarynyń alǵashqy nusqalary men 40-tan astam fotoalbom bar.
