G.Marchenko: Naýryzda Ulttyq banktiń taza halyqaralyq rezervteri 5,5 paıyzǵa ósip, 27,6 mlrd. dollardy qurady

Bul týraly búgin Almatyda ótken baspasóz máslıhatynda Ulttyq banktiń tóraǵasy Grıgorıı Marchenko málim etti.

Bas bankırdiń aıtýynsha, Ulttyq banktiń taza halyqaralyq rezervteri negizinen bankterdiń shetel valıýtasyndaǵy korrespondenttik shottarynyń ulǵaıýy jáne Ulttyq banktegi Úkimettiń shottaryna shetel valıýtasynyń túsýi esebinen 5,5 paıyzǵa ósip, 27,6 mlrd. dollardy qurady. Sonyń nátıjesinde taza valıýta qorlary (EAV) 6,7 paıyzǵa ulǵaıdy. Altyndaǵy aktıvter júrgizilgen operatsııalar jáne álemdik naryqtarda onyń baǵasynyń ósýi nátıjesinde 1,7 paıyzǵa artty.

Naýryzda eldiń halyqaralyq rezervteri jalpy alǵanda, Ulttyq qordyń shetel valıýtasyndaǵy aktıvterin qosa alǵanda (aldyn ala derekter boıynsha 59,8 mlrd. AQSh doll.) 87,9 mlrd. dollarǵa deıin 2 paıyzǵa, al jyl basynan beri 2,1 paıyzǵa ósti. Sondaı-aq aqsha bazasy 15,8 paıyzǵa keńeıip, 3045,0 mlrd. teńge boldy. Tar aqsha bazasy, ıaǵnı bankterdiń Ulttyq banktegi merzimdi depozıtterin eseptemegendegi aqsha bazasy 2835,8 mlrd. teńgege deıin 10,8 paıyzǵa keńeıdi. Aqpanda aqsha massasy 10536,2 mlrd. teńgege deıin 0,4 paıyzǵa ulǵaıdy. Aınalystaǵy qolma-qol aqshanyń kólemi 1409,5 mlrd. teńgege deıin 0,9 paıyzǵa azaıdy. Bank júıesindegi depozıtter 0,6 paıyzǵa ulǵaıyp, 9126,7 mlrd. teńge boldy. Depozıtterdiń aqsha massasynyń qurylymyndaǵy úlesi aınalystaǵy qolma-qol aqsha kóleminiń qysqarýy aıasynda depozıtter kóleminiń ósýi saldarynan aqpanda 86,4-ten 86,6 paıyzǵa deıin ósti.