Ǵ.Qurmanǵalıevtiń qurmetine batysqazaqstandyq ánshiler Astanada kontsert qoımaq
ASTANA. QazAqparat - 10 jeltoqsan kúni Astana qalasynyń «Astana» sýret galereıasynda Qazaqstan Respýblıkasynyń halyq ártisi, Memlekettik syılyqtyń laýreaty, ánshi-kompozıtor Ǵarıfolla Qurmanǵalıevtiń 105 jyldyǵyna arnalǵan batysqazaqstandyq óner sheberleriniń qatysýymen «Ánimen elin terbegen» atty dástúrli án keshi ótedi.
Atalmysh óner saparyn BQO mádenıet, muraǵattar jáne qujattama basqarmasynyń qoldaýymen Ǵ.Qurmanǵalıev atyndaǵy oblystyq fılarmonııa uıymdastyryp otyr.
Elorda tórinde ataqty ánshi, kezinde aıtysker aqyn retinde de keńinen tanylǵan QR eńbek sińirgen qaıratkeri Qatımolla Berdiǵalıev, dáýlesker dombyrashy, Qazaqstannyń eńbek sińirgen mádenıet qyzmetkeri Ermek Qazıev, QR eńbek sińirgen ártisi Sáýle Taýdaeva, Ǵarekeńniń tól shákirtteriniń biri Serik Ábdirahmanov, sondaı-aq respýblıkalyq baıqaýlardyń laýreattary Armat Islamǵalıev, Ernar Ómiráli, Danııar Eleýov, Laýra Muhamedjanovalar óner kórsetpek.
Endeshe, astanalyq aǵaıyn, kontsertke qosh kelersiz!
