Ǵ.Qasymov Frantsııanyń Qazaqstandaǵy Elshisimen kezdesti
ALMATY. 17 naýryz. QazAqparat /Áıgerim Ámir/ - Búgin QR Prezıdenttigine úmitker, Qazaqstan Patrıottar partııasynyń tóraǵasy, senator Ǵanı Qasymov Almatydaǵy shtabynda Frantsııanyń Qazaqstandaǵy Tótenshe jáne Ókiletti elshisi Jan-Sharl Bertonemen kezdesti.
«Men gazet-jýrnal, telearnalardy úzbeı oqyp, kórip otyram. Sonda baıqaǵanym, Siz saılaý aldyndaǵy úgit-nasıhat jumystaryńyzda ózekti máselelerdi kóterip kelesiz. Solardyń biri, atom energııasyna qatysty jumystaryńyz. Búginde Siz belsendi úmitkerlerdiń biri bolyp tursyz. Osy tusta meniń suraıyn degenim: kezekten tys saılaýdy ótkizýdiń sebebi nede?» - dedi Frantsııa Respýblıkasynyń Elshisi.
Senator Ǵanı Qasymov bul jaǵdaıǵa bylaısha túsinikteme berdi: «Prezıdenttiń quzyryn 2020 jylǵa deıin uzartýǵa baılanysty prezıdenttik jáne bıliktiń zań shyǵarý salasy arasynda daǵdarysty jaǵdaı týyndady. Osyǵan baılanysty keıbir qaıshylyqtar oryn alyp, Elbasy QR Parlamentin taratyp almas úshin kezekten tys saılaý ótkizýdi qolǵa aldy».
Sondaı-aq senator Frantsııanyń QR-daǵy Elshisimen óziniń saılaý aldyndaǵy baǵdarlamalaryn talqylady. Jan-Sharl Bertone baǵdarlamada qamtylǵan máselelerdi qoldaıtynyn aıtty.
