G. Golovkınniń «Astana» prezıdenttik kásibı klýbyna músheligi týraly kelissózder júrgizilip jatyr

«Búgin biz álem qaýymdastyǵyna «Astana» prezıdenttik kásibı sport klýbyn tanystyryp jatyrmyz. Bul sporttyq menedjmenttiń, sporttyq marketıngtiń búgingi zamandyq suranysy. Álbette, biz kásibı sport klýbyn álemdegi ataqty «Bavarııa», «Barselona», «Real-Madrıd» sekildi deńgeıde qurǵymyz keledi. Degenmen, bizdiń óz qazaqstandyq jolymyz bolady», - dedi D. Qaletaev. Onyń aıtýynsha, el namysyn álemdik arenada qorǵap júrgen komandalardyń basyn prezıdenttik klýbqa biriktirý jobany odan saıyn jemisti júzege asyrýǵa septigin tıgizetin bolady. «Sonymen qatar, bizdiń klýbtyń basty ereksheligi ulttyq sportqa basa mán berýdemiz. «Astana» prezıdenttik kásibı sport klýbynyń quramyna «Qazaqstan barysy» jobasynyń enýi de sony ańǵartady. Ekinshiden, bul mýltıbrendtik qurylym bolmaqshy. Óıtkeni, munda halyqaralyq deńgeıdegi «Astana velokomandasy», «Astana arlandary» kásibı boks komandasy, «Astana-Dakar tım» komandasy, «Barys» hokkeı klýby, sý jáne atústi polosy komandalary enip otyr. Olardyń arasynda qazaq sportynyń jaryq juldyzdary Ilıa Ilın men Denıs Ten bar», - dedi D. Qaletaev. Onyń aıtýynsha, kásibı sportty damytý arqyly buqaralyq sport ta oǵan ilese júrip, óz nátıjesin bere alady. «Al Gennadıı Golovkınge kelsek, onyń da «Astana» kásibı klýbyna qosylýǵa barlyq múmkindigi bar. Onymen kelissóz júrgizilip jatyr. Degenmen, Genanyń deńgeıi joǵary, dárejesi de bólek, oǵan tólenetin qarajat ta qomaqty. Shyndyǵyn aıtalyq, munda taza bıznes te, taza qarjylyq tetikter de bar. Sondyqtan da, Gena da ózi taýyp otyrǵan qarajattan qaǵylyp qalmaıtyndaı, «Astana» klýby da ózine aýyr júkteme alyp utylyp qalmaıtyndaı bolýy tıis. Degenmen, kelissózder júrip jatyr. Genanyń búgingi komandasy óte myqty. Solaı bolǵanymen, biz ortaq til tabamyz degen úmittemiz», - dedi D. Qaletaev.