G.Golovkın: sharshy alańda kez kelgen boksshymen judyryqtasýǵa daıynmyn
ASTANA. QazAqparat - Gennadıı Golovkın kelesi kezdesýin orta salmaqta WBC chempıony Mıgel Anhel Kottomen ótkizgisi keledi. Bul jaıynda qazaqstandyq boksshy meksıkalyq Marko Antonıo Rýbıomen jekpe-jeginen keıin málim etti.
«Qaıyrly kesh, dostar! Qoldaý kórsetkenderińiz úshin alǵysymdy bildiremin», - dedi G.Golovkın jek-jek aıaqtalǵannan keıin óz jankúılerlerine qarata.
«Rýbıo keri sheginýdi bilmeıtin boksshy. Alǵashqy sátte men ony bar kúshimdi jumsamaı jaı ǵana qaǵyp jiberdim. Degenmen, bul soqqym onyń nokaýtqa túsýine jetkilikti boldy», - dedi Qazaqstan boksshysy.
«Qazirgi ýaqytta mende úsh belbeý bar. Men kez kelgen boksshyǵa qarsy shyǵa alamyn. Dańqty boksshylarmen judyryqtasýǵa da daıynmyn. Kelesi kezdesýimdi Kottoǵa qarsy ótkizgim keledi. Ol tanymal boksshy, chempıon. Sharshy alańda Alvaraspen de, Chavespen de kezdeskim keledi», - dedi G.Golovkın.
Aıta keteıik, búgin AQSh-tyń Kalıfornııa shtatynyń Karson qalasynda WBA (Super) nusqasy boıynsha orta salmaqtaǵy álem chempıony, 32 jastaǵy qazaqstandyq boksshy Gennadıı Golovkın meksıkalyq Marko Antonıo Rýbıomen kezdesti. Ekinshi raýndta qazaqstandyq boksshy meksıkalyk qarsylasyn nokaýtqa jiberdi. Osylaısha, G.Golovkın óziniń kásibı rıngtegi 31-shi jeńisine qol jetkizdi. Qazaqstandyq boksshynyń bul jekpe-jegin álemniń 120 eliniń kórermeni tamashalady.
