G.Golovkın men O.Adamanyń jekpe-jegi álemniń 100-den asa elinde tikeleı efır arqyly kórsetildi
ASTANA. QazAqparat - Monako elinde ótken Gennadıı Golovkın men Osýmaný Adamanyń jekpe-jegin uıymdastyrýshylardyń aıtýynsha, kezdesý álemniń 100-den astam elinde tikeleı efır arqyly kórsetilgen.
Bul sporttyq shara Eýropa, Azııa jáne Ońtústik Afrıka elderinde praım-taım ýaqytynda berildi. Aıta ketken oryndy, aıqas bastalar aldynda MUSICOLA dýeti Qazaqstannyń ánuranyn oryndady. Sondaı-aq, rıng arqandary jáne sharshy alań EXPO 2017 halyqaralyq kórmesinen habardar eter jazýlarmen órnekteldi. Osylaısha tórtkúl dúnıedegi sport dese ishken asyn jerge qoıar san mıllıondaǵan jankúıer Qazaq elin taǵy bir jańa qyrynan tanydy.
K2 Promotions kompanııasynyń promoýteri Tom Lefflerdiń sózine qaraǵanda, atalmysh jekpe-jekke jankúıerler tarapynan qyzyǵýshylyq óte joǵary bolǵan. Bul qazaqstandyq kásibı boksshy Gennadıı Golovkınniń sport álemindegi eń jaryq juldyzdardyń biri ekendigin dáleldeıdi.
Ekiniń biri bile bermes, Gennadıı Golovkın qazirgi ýaqyttaǵy kásibı bokstaǵy chempıondar arasynda jáne boks tarıhyndaǵy orta salmaqta nokaýtqa túsirý paıyzy jaǵynan birinshi orynda keledi. Sondaı-aq, «Ring» (AQSh) jýrnaly júrgizgen saýalnamanyń qorytyndysy boıynsha ol ótken jyly «Jyl boksshysy» atandy.
Jerlesimiz aldaǵy kezekti kezdesýin sáýir aıynda Nıý-Iork qalasyndaǵy Medıson Skver Garden arenasynda ótkizedi dep kútilip otyr. Sport mamandarynyń aıtýyna qaraǵanda, ol avstralııalyq eks-chempıon Denıel Gılmen nemese amerıkalyq Djeıms Kırklendpen jekpe-jekke shyǵýy múmkin.
