G.Golovkın: Men «mashına» emespin, qarapaıym qaraǵandylyq jigitpin
ASTANA. QazAqparat - Álemge áıgili qazaqstandyq boksshy, WBA, IBF IBO jáne WBC tujyrymdarynyń chempıony Gennadıı Golovkın Astanadaǵy jankúıerlerimen kezdesý ótkizdi.
Kezdesý barysynda jankúıerlerdiń biri: «Gennadıı Golovkınniń basty qupııasy nede?» degen saýal tastaǵan bolatyn. Gennadıı bul saýaldy oǵan jıi qoıatyndyǵyn jasyrmady. Tipti kóp sarapshylar boksshyny «mashına», «temir adam» dep ataıdy. Osyǵan qaramastan, boksshy ózin qarapaıym qaraǵandylyq jigit retinde sezinedi.
«Meniń qupııamdy bilgileriń kele ma? Men qarapaıym adammyn, bary sol ǵana. Men «mashına» emespin. Mashına keıde synyp turatyny bar», - dedi ol jankúıerlerge bergen jaýabynda. - Mende óz kóligim joq. Júrgize alamyn, biraq ózimniń kóligim joq».
Sonymen qatar Gennadıı Golovkın sózderiniń birinde orta salmaqtaǵy barlyq belbeýlerge qol jetkizýdi armandaıtyndyǵyn aıtyp qaldy.
«Shynynda boks sonshalyqty qıyn emes. Úsh-aq soqqy: týra, astynan, janynan. Bul fýtbol oınaǵandaı ońaı sharýa. Meniń armanym orta salmaqtaǵy barlyq belbeýlerdi jeńip alý», - dedi GGG.
Sonymen qatar G. Golovkın kásipqoı bokstaǵy mansabyn qashan aıaqtaıtyndyǵyna qatysty saýalǵa jaýap berdi.
«Meniń qupııalarymdy taǵy da bilgileriń kelip otyr. Jigitter, qazir men ózimdi keremet sezinemin, densaýlyǵymnyń da shama-sharqy jetip artylady. Kásipqoı boksta qansha ýaqyt bolatynym belgisiz. Barlyǵy jaǵdaıǵa baılanysty. Árıne, boks - óte qaýipti sport. Eger osymen bolǵanyn sezsem, sóz beremin, men sporttan ketýdi oılastyra bastaımyn», - dedi sýperchempıon.
Aıta keteıik, G. Golovkın kelesi kezdesýin kúzde ótkizetindigi belgili. Alaıda onyń qarsylasy áli anyqtalǵan joq. Saýl Alvares Gennadıı Golovkınmen kezdesýden bas tartqannan keıin, qazaqstandyq boksshy WBC tıtýlyna ıe bolǵan edi.
