G. Golovkın Álem chempıony ataǵyn qorǵaý úshin jekpe-jek ótkizedi
ALMATY. 22 qarasha. QazAqparat /Erlik Erjanuly/ - Qazaqstandyq kásipqoı boksshy Gennadıı Golovkın 16 jeltoqsanda Astanada Dúnıejúzilik boks qaýymdastyǵy boıynsha Álem chempıony ataǵyn qorǵaý úshin alǵashqy jekpe-jegin ótkizedi.
Qazaqstan kásipqoı boks federatsııasynyń prezıdenti Vıktor Demıanenkonyń aıtýynsha, kezdesý Qazaqstan áýesqoı boks federatsııasy kýbogynyń aqtyq saıysynan keıin ótedi. Qazir quzyrly mekemeler bul sharanyń qujattaryn ázirlep jatyr.
Gennadıı Golovkın sońǵy jekpe-jegin 15 tamyzda Panamadaǵy Roberto Dýran arenasynda kolýmbııalyq Mılton Nýnezben ótkizgen edi. Dúnıejúzilik boks qaýymdastyǵynyń 72,6 kelige deıingi salmaqtaǵy búginde bos turǵan Álem chempıony ataǵy úshin bolǵan bul saıysta qazaqstandyq boksshy qarsylasyn alǵashqy raýndta tehnıkalyq nokaýtpen jeńdi. Al qazan aıynda Dúnıejúzilik boks qaýymdastyǵy G. Golovkındi tolyqqandy Álem chempıony dep jarııalaǵan bolatyn. Óziniń bul ataǵyn qorǵaý úshin Gennadıı alǵashqy kezde Berlınde meksıkalyq Marko Antonıo Rýbıomen kezdesetini týraly sóz qozǵalǵan edi. Keıin qarsylasy ózgerip, kolýmbııalyq Nelson Hýlıo Tapııamen bolatyn jekpe-jekti G. Golovkın Qazaqstanda Almaty men Astana qalalarynyń birinde ótkizýge qulshynys bildirgen bolatyn.
Nelson Hýlıo Tapıa buǵan deıin 17 kezdesý ótkizip, onyń 14-in jeńip (10-y nokaýtpen), ekeýinde jeńilis taýyp, bireýinde teń tústi. Al Gennadıı Golovkın bolsa 18 kezdesýdi túgel (15-i nokaýtpen) óz paıdasyna sheshken bolatyn.
