G.Golovkın, A.Vınokýrov, B. Esentaeva, Q.Nurtas jáne S.Altynbekova Ice Bucket Challenge estafetasyn qabyldady
ASTANA. QazAqparat - Qazaqstannyń esimi elge tanymal sportshylary, ánshileri men saıasatkerleri Ice Bucket Challenge qaıyrymdylyq aktsııasyna belsendi qatysyp, muzdaı sý quıyný sátteri túsirilgen vıdeony ózderiniń áleýmettik jelilerine salýda.
Máselen, Olımpıada chempıony Aleksandr Vınokýrov bir shelek sý quıynǵannan keıin sál denesin qyzdyryp alyp, muzdaı taý ózenine kúmp bergen. Al ánshi Qaırat Nurtas bolsa, bul aktsııaǵa qatysý úshin ekskavatordyń kómegine júgingen. Kóptegen qazaqstandyqtyń súıikti ánshisine aınalǵan ol ekskavator qalaǵynan sarqyraı aǵylǵan muzdaı sýdyń astyna turdy. Dańqty boksshy Gennadıı Golovkınniń de bul aktsııaǵa qatysýy erekshe oryn aldy. Ol muz aralas sýdy quıynyp, shamamen 10 mınýt muzdatqyshta otyrǵany ǵalamtorda jarııalandy.
Astana qalalyq mádenıet basqarmasynyń basshysy Bolat Majaǵulov qazaqtyń ulttyq kıimin kıgen birneshe qyzdyń ortasynda turyp, muzdaı sý qabyldady. Elordadaǵy Beıbitshilik pen kelisim saraıynda ótken sharada qyzdar elordalyq sheneýnikti muzdaı sýǵa ábden malshyndyrdy.
Al «Barys» hokkeı klýbynyń oıynshysy Kevın Dallmen jattyǵýdan keıin muz aıdyny ústinde denesin jalańashtap, 1 shelek sýdy tóbesinen aqtara saldy.
Bulardan bólek sý quıý flesh-mobyna Olımpıada chempıony Serik Sápıev, tanymal sportshylar Serik Eleýov pen Dmıtrıı Karpov, ánshiler Meırambek Besbaev, Sáken Maıǵazıev, Maqpal Isabekova, Aıqyn, Erlan Kókeev, prodıýserler: Baıan Esentaeva, Alýa Qońyrova, Erık Tastambekov, fýtbolshylar Samat Smaqov pen Davıd Lorııa, voleıbolshy Sabına Altynbekova, telejúrgizýshi Láılá Sultanqyzy men Dınara Satjan, QR Parlamenti Májilisiniń depýtaty Vladıslav Kosarev pen Maıra Aısına qatysty.
Bul tizimniń qatary kúnnen-kúnge tolyǵa túseri sózsiz. Qazirdiń ózinde elimizde esimi tanymal birqatar adamǵa sý quıý aktsııasyna qatysý shaqyrtýy berilgen. Olardyń qatarynda: Denıs Ten, Ilıa Ilın, Bekbolat Tileýhan, Ǵanı Qasymov, Erbolat Dosaev bar.
Buǵan qosa otandyq shoý-bıznestiń jarqyn ókilderi, sportshylar men saıasatkerler tanymal telejúrgizýshi Arýjan Saın qurǵan «Qaıyrymdylyq» qoryna qarjy aýdarýda.
Aıta keteıik, ALS Ice Bucket Challenge flesh-mobyn búıirlik amıotrofıktik sklerozben kúres jónindegi qaıyrymdylyq qory uıymdastyrǵan. Aktsııa maqsaty - mıdyń qozǵalý ortalyqtaryn zaqymdap, adamdy sal etetin atalmysh aýrýǵa qoǵam nazaryn aýdartý.
