G-Global: «Jibek joly» jahandyq syılyǵyn taǵaıyndaıtyn halyqaralyq komıtet qurylady
Ortalyq kommýnıkatsııalar qyzmetinde ótken brıfngide G-Global halyqaralyq hatshylyǵynyń basshysy Serik Nógerbekov osyndaı málimet berdi.
«Birinshiden, Mandela hanym men Ázerbaıjan, Qyrǵyzstan, Grýzııa elinen tikeleı baılanysqa shyqqan spıkerlerge alǵys aıtqym keledi. Ekinshiden, Mandela hanymmen ekinshi kún qatarynan aralasa otyryp, Ortalyq Azııa, Ońtústik Kavkaz jáne Afrıka aýyldaryndaǵy áıelderdi qoldaý qoryn qurý kerek degen sheshim qabyldadyq. Keleshekte oǵan Aýǵanstan áıelderi de kiredi», - dedi G-Global halyqaralyq hatshylyǵynyń basshysy.
Onyń aıtýynsha, atalǵan qordy Mandela Tembekıle qorynyń bas dırektory, Nelson Mandelanyń nemeresi Ndıleka Mandela hanym basqarady.
«Qordyń keńsesi Ońtústik Afrıkada ornalasady. Óıtkeni ol jaqta Mandela famılııasy óte bedeldi ekenin bilesizder. Eń bastysy, bul qor atalǵan óńirlerdegi barsha qoǵamdyq uıymdardyń basyn biriktiredi. Atalǵan óńirlerdiń bárinde aýyl áıelderin qoldaý boıynsha jumys júrip jatyr. Sol kúshterdi biriktirgimiz keledi. Ol úshin iri korporatsııalar men qorlarǵa qoldaý kórsetý boıynsha júginemiz. Coca-Cola korporatsııasy óz qory arqyly bizge bul iste kómek kórsetip keledi. Ózge de sheteldik kompanııalar, otandyq kompanııalar, iri qorlar osy iske atsalyssa eken deımiz», - degen Serik Nógerbekov «Jibek joly» jahandyq premııasyn taǵaıyndaý bastamasy da iske asýǵa jaqyn ekenin atady..
«Mandela hanymmen taǵy bir bastama boıynsha kelistik. «Bir beldeý – bir jol» forýmynyń qorytyndysy boıynsha 40 eldiń kóshbasshylary deklaratsııa qabyldaǵan bolatyn. Osy qorytyndy deklaratsııada «Jibek joly» jahandyq premııasyn taǵaıyndaý týraly Qazaqstan bastamasyn qoldaý kerektigi aıtylǵan. Biz qazir Mandela hanymmen osy premııany taǵaıyndaıtyn halyqaralyq komıtettiń jeke quramyn bekitý boıynsha jumys júrgizip jatyrmyz», - dedi ol ortalyq kommýnıkatsııalar qyzmetinde.
