«G-Global» Jambyl oblysynda eki jobany júzege asyrýǵa daıyn
TARAZ. QazAqparat – Tarazda Jambyl oblysynyń ákimdigi men «G-Global» halyqaralyq hatshylyǵy arasynda ózara yntymaqtastyq týraly memorandýmǵa qol qoıyldy, dep habarlaıdy QazAqparat tilshisi oblys ákimdiginiń resmı saıtyna silteme jasap.
Taraptar G-Global platformasynda turaqty áleýmettik-ekonomıkalyq ósim, ınvestıtsııalardy tartý, qorshaǵan ortany qorǵaý, jasyl ekonomıka, týrızm jáne ekotýrızm salasynda birlesken is-sharalar ótkizýge daıyn ekendikterin rastady.
Jambyl oblysy ákimdiginiń atynan memorandýmǵa aımaq basshysy Berdibek Saparbaev, «G-Global» hatshylyǵynan – onyń basshysy Serik Nógerbekov qol qoıdy.
Qonaqtar ózderiniń eki mańyzdy jobalaryn tanystyrdy. Olardyń birinshisi «Sirius market» ekojúıesin testilik rejımge engizýdi kózdeıdi desek, ondaǵy maqsat – deldaldardy aralastyrmaı, túrli maqsattaǵy taýarlardy óndirýshiden tutynýshyǵa tikeleı jetkizý bolyp tabylady. Ekinshi joba qazirgi zamanǵy ádisnamany qoldana otyryp, ambýlatorııalyq jaǵdaıda onkologııalyq aýrýlarmen aýyratyn naýqastardy emdeýge baılanysty.
«Biz óńirimizdiń áleýmettik-ekonomıkalyq damýyna baǵyttalǵan jobalardy árdaıym qoldaımyz. Bizge jańa ıdeıalar men jańa tehnologııalar qajet. Bizde aýqymdy ınvestorlarmen jumys tájirıbesi bar. Biz sizderdiń usynystaryńyzdy júzege asyrýǵa kómek kórsetýge daıynbyz», – dedi B.Saparbaev.
