Ǵ. Bıtenov «Samuryq-Qazyna» AQ quqyqtyq súıemeldeý jáne táýekelder jónindegi basqarýshy dırektor bolyp taǵaıyndaldy
Ol qor men portfeldik kompanııalardaǵy korporatıvtik basqarý jáne táýekel-mádenıetin, quqyqtyq qamtamasyz etý, sonymen qatar, jańa baǵyt - komplaens salalaryn jaýaptanatyn bolady.
«Samuryq-Qazyna» AQ Korporatıvtik kommýnıkatsııalar bóliminiń habarlaýynsha, qordyń jańa basqarý modeline sáıkes kompanııalar tobynda komplaens-táýekelderdi barynsha azaıtýǵa baǵyttalǵan jańa fýnktsııa engiziledi. Bul bıznes júrgizýdiń, qor kompanııalary toby qyzmetiniń aıqyndyǵy men ashyqtyqtyǵyn qamtamasyz etip, ondaǵy laýazymdy tulǵalar men qyzmetkerlerdiń zańnama talaptaryna, ozyq halyqaralyq standarttarǵa, ishki jáne basqa ta talaptarǵa saı kelýin kózdeıdi.
36 jastaǵy Ǵanı Bıtenov quqyq doktory (DoctorofCivilLaw), McGillUniversity (Kanada, Monreal q.). «Dúnıejúzilik saýda uıymy tártibimen munaı jáne gaz saýdasyn retteý: saýda erejeleriniń munaı-gaz ındýstrııasyndaǵy ahýalmen aradaǵy qaıshylyǵy» taqyrybynda doktorlyq dıssertatsııa qorǵaǵan; quqyq magıstri (LLM), UniversityofAberdeen (Ulybrıtanııa, Aberdın q.); ekonomıka magıstri (MA), QR Prezıdenti janyndaǵy Qazaq menedjment, ekonomıka jáne boljaý ınstıtýty (KIMEP). Garvard ýnıversıteti men basqa da tanymal halyqaralyq ınstıtýttarda biliktilikti arttyrý kýrstarynan ótken.
Halyqaralyq Shanhaı arbıtraj ortalyǵynyń arbıtri.
Halyqaralyq (Bracewell&Giuliani) jáne qazaqstandyq zańgerlik kompanııalarynda 10 jyldan astam ýaqyt jetekshi qyzmetter atqarǵan. Sondaı-aq ol QR Ádilet mınıstrliginiń memlekettiń múlik quqyqtaryn qorǵaý departamentine basshylyq etti. Osy tusta shaǵym somasy júzdegen mıllıon AQSh dollaryna baǵalanǵan halyqaralyq ınvestıtsııalyq daýlarda QR múddesin qorǵady. Eýrazııa damý bankiniń halyqaralyq jáne qazynashylyq operatsııalardy quqyqtyq qamtamasyz etý bólimin basqarǵan.
Atalǵan kandıdat elimizdiń halyqaralyq bedelin nyǵaıta túsý maqsatynda KazAlliance qaýymdastyǵymen tize qosa uıymdastyrylǵan birlesken joba aıasynda irikteldi. Ol álemniń 27 elindegi 70-ten astam stýdenttik uıymdardy qamtydy. Qaýymdastyq quramynda shet memleketterde bilim alyp jatqan nemese turaqty mekendep, eńbek etip júrgen 50 myń otandasymyz bar. 2015 jyly «Samuryq-Qazyna» AQ men KazAlliance qaýymdastyǵy birlesip, London men Beıjiń qalalarynda eki aqparattyq túsindirme sessııalaryn uıymdastyrǵan bolatyn.
Jańa basqarý qurylymyna kóshken «Samuryq-Qazyna» AQ Qordaǵy top-menedjerlerdiń sanyn eki esege azaıtýdy kózdeıdi. Atap aıtqanda, basqarma tóraǵasynyń orynbasary laýazymdary qysqartyldy.
