G.Ábdiqalyqovanyń qatysýymen Túrme reformasy forýmy ótedi

ASTANA. QazAqparat - Erteń QR Memlekettik hatshysy Gúlshara Ábdiqalyqovanyń qatysýymen 2-shi Túrme reformasy forýmy ótedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bas prokýratýrasy departamenti basshysynyń orynbasary Berik Jaqaev málim etti.

«Erteń QR Bas prokýratýrasynyń ǵımaratynda 2-shi Túrme reformasy óz jumysyn bastaıdy. Onyń jumysyna Parlament depýtattary, Prezıdent ákimshiliginiń, dıplomatııalyq, halyqaralyq jáne úkimettik emes uıymdardyń ókilderi, quqyq qorǵaý jáne ortalyq memlekettik organdardyń basshylary qatysady dep kútilýde. Beınekonferentsııa arqyly óńirlerdegi múddeli mekemeleriniń qyzmetkerleri de qatysady», - dedi ol.

Onyń atap ótýinshe, ótken jyly uıymdastyrylǵan forým barysynda eki joba qolǵa alynǵan. Onyń birinde jeńil-jelpi qylmys jasaǵan sottalýshylardy túrmege jabýdyń ornyna elektrondy bilezik taǵý arqyly bostandyqqa shyǵarý kózdelgen. Al ekinshisinde túrme halqy sanyn tómendetýge baǵyttalǵan 10 shara qamtylǵan.

«Bul jobalar qazirgi ýaqytta óz nátıjesin berip otyr. Sol kezde aıtylǵan usynystardyń basym bóligi Qylmystyq, Qylmystyq atqarý kodeksterinde kórinis tapty. Jalpy, birinshi forým tabysty ótti deýge bolady», - dedi B.Jaqaev.