G.Ábdiqalyqova jahandyq áıelder sammıtine qatysý úshin Varshava qalasyna keldi
Mınıstrlik deńgeıindegi alqaly jıynda sóılegen sózinde G.Ábdiqalyqova «Qazaqstan-2050» strategııasynda Memleket basshysy N.Nazarbaev elimizdiń aldyna álemniń eń ozyq otyz memleketiniń qataryna qosylý jóninde mindet qoıǵanyn atap ótti. Bul maqsatqa qol jetkizý úshin Qazaqstanda memlekettiń eseptiligin arttyrýǵa, zańnyń ústemdigin qamtamasyz etýge, ekonomıkanyń ártaraptandyrylýyna jáne adamı kapıtaldyń jan-jaqty damýyna baǵyttalǵan aýqymdy ınstıtýtsıonaldyq reformalar júrgizilýde.
Memlekettik hatshy Qazaqstanda qazirgi zamanǵy ınklıýzıvtik ekonomıkanyń damýyna barlyq jaǵdaı jasalyp jatqanyn aıtty. «Bıznestiń jol kartasy - 2020», «Jumyspen qamtýdyń jol kartasy - 2020», jeńildikpen nesıeleý baǵdarlamalary, onyń ishinde Eýropa qaıta qurý jáne damý banki, Azııa damý bankimen birlesken jobalar arqyly memlekettik baǵdarlamalar iske asyrylýda.
G.Ábdiqalyqova jasalyp jatqan sharalar áıelderdiń el ekonomıkasyn damytý isine qatysý úlesin arttyrýǵa múmkindik týǵyzǵanyn atap kórsetti. Búginde áıelderdiń bıznestegi úlesi - 50%, al 42%-y shaǵyn jáne orta bıznes kásiporyndaryn basqaryp otyr. Áıelderdiń jumyssyzdyq deńgeıi 2006 jylǵy 9,2%-dan 2015 jylǵy 5,6%-ǵa deıin, al eńbekaqynyń genderlik alshaqtyǵy 2006 jylǵy 62%-dan 2015 jylǵy 67%-ǵa deıin azaıdy. Qazaqstan «Jumys istep jatqan áıelder, erlermen salystyrmaly úlesi» atty kórsetkish boıynsha, 2015 jylǵy Dúnıejúzilik ekonomıkalyq forýmynyń Jahandyq básekege qabilettilik ındeksinde 26-shy orynǵa ıe boldy.
Sammıt sheńberinde Memlekettik hatshy Polsha Respýblıkasynyń Premer-mınıstri B.Shydlomen kezdesti. Taraptar Qazaqstan-Polsha qarym-qatynasynyń ózekti máselelerin talqylady. Kezdesý barysynda Memlekettik hatshy Polshanyń Kazaqstan úshin Eýropalyq odaqtaǵy, Ortalyq jáne Shyǵys Eýropadaǵy mańyzdy seriktes ekenin aıta kelip, el basshylyǵy Qazaqstannyń Dúnıejúzilik saýda uıymyna kirýine qoldaý kórsetkenine jáne Astanada ótetin EKSPO-2017 halyqaralyq kórmesine qatysatyn bolǵanyna rızashylyq bildirdi.
Polsha Respýblıkasy Prezıdentiniń jubaıy A.Kornhaýzer-Dýdamen kezdesý barysynda G.Ábdiqalyqova Birinshi hanymǵa Sammıttiń joǵary deńgeıde uıymdastyrylǵany úshin Sammıttiń Qurmetti Patrony retinde alǵysyn bildirdi. Sondaı-aq, Memlekettik hatshy eki el arasynda bilim salasyndaǵy yntymaqtastyqtyń qarqyndy damyp kele jatqanyn atap ótti. Bilim salasyndaǵy ekijaqty úkimetaralyq yntymaqtastyq týraly kelisimge qol qoıyldy. Qazirgi tańda Varshava, Krakov, Lodzı, Poznan jáne Jeshýv ýnıversıtetterinde 500-den astam qazaqstandyq stýdent bilim alýda.
Sammıttiń aldaǵy eki kúninde Memlekettik hatshy Germanııa, Frantsııa, Vetnam, Malaızııa elderi delegatsııa basshylarymen ekijaqty kezdesýler ótkizedi dep josparlanyp otyr.