G.Ábdiqalyqova: Tehnıkalyq jáne kásiptik bilim berý júıesi mamandaryna arnalǵan memlekettik tapsyrys qurylymy ózgeredi
ASTANA. QazAqparat - Elimizde tehnıkalyq jáne kásiptik bilim berý júıesi mamandaryna arnalǵan memlekettik tapsyrys qurylymy ózgeriske ushyraıdy. Bul týraly búgin QR Parlamenti Májilisindegi «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda QR Premer-Mınıstriniń orynbasary Gúlshara Ábdiqalyqova málim etti.
Vıtse-premerdiń atap ótýinshe, bilim berý júıesi teorııalyq bilim berýmen qatar shynaıy óndiristik jaǵdaıǵa shuǵyl arada beıimdele alatyn daǵdysy bar kadrlar daıyndaýy qajet. Sondyqtan da elimizdegi tehnıkalyq jáne kásiptik bilim berý júıesi bıznespen seriktestik tyǵyz qarym-qatynasty nyǵaıta túsetin bolady. Kolledjder jumys berýshilerdiń qajettiligine baǵyt alsa, oqý baǵdarlamalary stýdentterge bilim, iskerlik ári daǵdy berýdi qalyptastyrýǵa negizdeledi.
«Óńirlik teńgerimsizdikti eskere otyryp, tehnıkalyq jáne kásiptik bilim berý júıesi mamandaryna arnalǵan memlekettik tapsyrys qurylymyn ózgertý arqyly tehnıkalyq, kásiptik bilim qoljetimdiligi úshin jaǵdaı jasalatyn bolady», - dedi ol.
