G.Ábdiqalyqova Sh.Qaldaıaqovtyń 85 jyldyǵyna arnalǵan «Meniń Qazaqstanym» festıvaliniń jeńimpazdaryn marapattady

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Shámshi Qaldaıaqovtyń 85 jyldyǵyna arnalǵan «Meniń Qazaqstanym» atty VI halyqaralyq án festıvaliniń jeńimpazdaryn marapattaý saltanatyna qatysty, dep habarlaıdy Aqordanyń baspasóz qyzmeti.

Qazaqtyń án ónerin keńinen tanytý jáne qoldaý maqsatyna arnalǵan festıvalge Qazaqstan estrada sheberleri, sondaı-aq «qazaq valsiniń koroli» Shámshi Qaldaıaqov ánderiniń baı murasyn repertýaryna engizgen daryndy jastar qatysty.

Kópshilikke arnaǵan sózinde Memlekettik hatshy G.Ábdiqalyqova Shámshi Qaldaıaqovtyń qazaq mádenıeti men ónerin damytýǵa qosqan erekshe úlesine Qazaqstan Prezıdenti táýelsizdik jyldary úsh birdeı Jarlyǵy arqyly joǵary baǵa bergenin atap aıtty.

Atap aıtqanda, 1991 jyly Sh.Qaldaıaqov «Qazaqstannyń halyq ártisi» qurmetti ataǵyn ıelense, 2006 jyly onyń áıgili «Meniń Qazaqstanym» áni elimizdiń memlekettik ánuranyna aınaldy, al 2010 jyly avtorǵa QR Memlekettik syılyǵynyń laýreaty ataǵy berildi.

G.Ábdiqalyqova Sh.Qaldaıaqov atyndaǵy halyqaralyq án festıvali laýreattarynyń EKSPO-2017 ulttyq jobasyn iske asyrý aıasynda búkilqazaqstandyq mádenıettiń tanystyrylymy sharasyna qatysatynyn atap ótti.

Bıyl elimizdiń barlyq óńirinde festıvaldiń irikteý týrlary ótti. Bas júlde úshin 33 qatysýshy saıysqa tústi. Festıvaldiń bas júldesin ıelengen Ulpan Ábdikárimovaǵa 1 000 000 teńge aqshalaı syılyq tapsyryldy.

Festıvaldiń gala-kontsertine Qazaqstan sahna óneriniń sheberleri - QR halyq ártisi N.Núsipjanov, respýblıkanyń eńbek sińirgen ártisteri M.Іlııasova, M.Muhamedqyzy, elimizdiń eńbek sińirgen qaıratkerleri H.Shalabaeva, A.Jyltyrkózov, halyqaralyq konkýrstardyń laýreattary M.Arapbaeva, O.Altynbekov, B.Isaev, S.Baıjumanova, A.Kishkenbaev jáne Shámshi Qaldaıaqov atyndaǵy «Meniń Qazaqstanym-2014» halyqaralyq án festıvaliniń bas júldegeri Q.Aıbek qatysty.