G. Ábdiqalyqova otbasylyq qundylyqtardy dáripteýdiń aqparattyq jumystaryn kúsheıtýdi júktedi

ASTANA. QazAqparat - Búgin QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda QR Memlekettik hatshysy Gúlshara Ábdiqalyqova otbasylyq jáne adamgershilik qundylyqtardy dáripteý boıynsha aqparattyq-túsindirý jumystaryn kúsheıtýdi tapsyrdy.

Jıyn barysynda bala asyrap alý men patronatty tárbıeni jetildirý máseleleri qaraldy. Belgili bolǵandaı, júrgizilgen jumystar bıylǵy birinshi toqsanda balalar úıindegi 219 balany óz otbasylaryna qaıtarýǵa, sondaı-aq 215 balany patronatty tárbıe berýge jáne ózgelerdiń asyrap alýyna múmkindik berdi.

G. Ábdiqalyqova Qazaqstan Myńjyldyqtyń besinshi maqsatyna merziminen buryn qol jetkizgenin, analar óliminiń deńgeıi úsh ese tómendegenin atap ótti. Osy oraıda 1999 jyly tiri týylǵan ár 1000 balaǵa 55 ana óliminen kelse, 2013 jyly bul kórsetkish 12,6 paıyzǵa deıin azaıdy.

Dúnıejúzilik ekonomıkalyq forýmnyń 2014 jylǵy esebine sáıkes, 57 elden turatyn topta elde AITV ınfektsııasynyń taralýy boıynsha Qazaqstan tómen kórsetkishpen, ıaǵnı 0,2 paıyzben birinshi oryndy ıelendi.

Aıta keteıik, otyrysta Memleket basshysynyń tapsyrmasy boıynsha ázirlenip, Úkimet qabyldaǵan otbasylyq qatynastardy, moraldyq-etıkalyq jáne rýhanı-adamgershilik qundylyqtardy nyǵaıtýdyń 2015-2020 jyldarǵa arnalǵan jalpyulttyq is-sharalar josparynyń oryndalý barysy qaraldy.