G. Ábdiqalyqova Nankın Olımpıadasynyń júldegerlerin qarjylaı sertıfıkattarmen marapattady
ASTANA. QazAqparat - Búgin Astanadaǵy "Saryarqa" velotreginde QR Premer-Mınıstriniń orynbasary Gúlshara Ábdiqalyqova Qytaıdyń Nankın qalasynda ótken ІІ jasóspirimder Olımpıadasynyń jeńimpazdary men júldegerlerin quttyqtady.
"Sizderdi Qytaıdyń Nankın qalasynda ótken ІІ jazǵy jasóspirimder Olımpıadasynda tamasha óner kórsetip, Qazaqstannyń namysyn laıyqty qorǵap kelgen jetistikterińizben shyn júrekten quttyqtaımyn!
Elbasy-Ult kóshbasshysy Nursultan Nazarbaevtyń jan-jaqty qamqorlyǵynyń arqasynda sportty ekpindi damytyp kele jatqan elimizdiń dál sizderdeı maqtanýǵa turatyn ul-qyzdary barlyǵyna biz sheksiz qýanyshtymyz", - dedi ol.
Vıtse-premerdiń aıtýynsha, oıyndar qorytyndysy boıynsha qazaqstandyq jas sportshylar 3 altyn, 1 kúmis jáne 4 qola medal utyp alyp, І jasóspirimder Olımpıadasyndaǵy kórsetkishin jaqsartyp, resmı emes jalpykomandalyq esepte 21-orynǵa taban tiredi.
Onyń aıtýynsha, qazirgi Olımpıadalyq oıyndar álem qaýymdastyǵy ómirinde úlken oryn alady. Bular jaı ǵana sporttyq saıystar emes, búginde Olımpıada oıyndary kez kelgen eldiń áleýmettik-ekonomıkalyq, qoǵamdyq-saıası áleýetin pash etedi.
"Sondyqtan 200-den astam eldiń sportshylary qatysqan básekege toly saıysta komanda boıynsha 21-shi oryndy ıelený - sizder men bapkerlerińizdiń eren eńbegi. Sonymen qatar, sizder sporttyq rezerv daıyndaýdaǵy qazaqstandyq júıeniń básekege qabiletti ekenin dáleldep, álemdik dárejedegi sportshylardyń turaqty túrde ári úzdiksiz tárbıelenip jatqanyn kórsettińizder", - dedi vıtse-premer.
Osydan keıin G. Ábdiqalyqova sportshylar men olardyń bapkerlerin Memleket basshysynyń jáne el Úkimetiniń atynan quttyqtap, qarjylaı sertıfıkattarmen marapattady. Aıta keteıik, altyn medal ákelgen sportshylar Abylaıhan Júsipovke, Muhambet Qýatbekke, Baýyrjan Jaýyntaevqa 1 mln. 820 myń teńge kóleminde, kúmis medal ıegeri Vadım Kazakovqa 910 myń teńge, al qola júldegerlerge 540 myń teńge kóleminde sertıfıkattar tabystaldy. Sondaı-aq jas sportshylardy jattyqtyrǵany úshin olardyń bapkerleri de qarjylaı sertıfıkattar aldy.
