G.Ábdiqalyqova: Qazaqstanda mektepke deıingi uıymdardy oqý-ádistemelik materıaldarmen jabdyqtaý zańmen retteletin bolady
ASTANA. QazAqparat - Qazaqstanda mektepke deıingi uıymdardy oqý-ádistemelik materıaldarmen jabdyqtaý zańmen retteletin bolady. Bul týraly búgin bilim berý qyzmetkerleriniń respýblıkalyq tamyz keńesinde QR Premer-Mınıstriniń orynbasary Gúlshara Ábdiqalyqova aıtty.
«Aýyldyq jerlerde bilim berýdi damytýǵa, tirek aýyldarda ınternattardy qaıta qurý arqyly shaǵyn jıyntyqty mektepterdiń materıaldyq-tehnıkalyq bazasyn jáne kadrlyq quramyn nyǵaıtýǵa erekshe nazar aýdarý qajet», - dedi ol.
Sondaı-aq vıtse-premer mektepke deıingi bilim berýdiń oqý baǵdarlamasy, pedagogtardyń biliktiligin arttyrý júıesi jańartylý ústinde ekendigin atap ótti.
«Mektepke deıingi uıymdardy jergilikti deńgeıde oqý-ádistemelik materıaldarmen jabdyqtaý máselesin zańmen retteý josparlanýda. Zań jobasy 2014 jyldyń quyrkúıeginde Parlamentke engiziledi», - dedi G.Ábdiqalyqova.
