G. Ábdihalyqova depýtat Perýashevtiń mınıstrlikti taratý kerek degen málimdemesine resmı jaýap qaıtardy
ASTANA. 27 shilde. QazAqparat - Eńbek jáne halyqty áleýmettik qorǵaý mınıstri Gúlshara Ábdihalyqova mınıstrlik bolý kerek, jumys isteýi kerek dep esepteıdi.
Bul týraly ol búgin Bnews.kz portalyna ótken onlaın-konferentsııada málim etti.
«Bizdiń mınıstrlik sońǵy 12 jyldyń ishinde júıeli túrde baǵyt-baǵdar boıynsha birshama isti tııanaqtady. Mysaly úlken aqparattyq júıe bar, barlyq zeınetkerler, áleýmettik tólem alatyndar týraly kompıýterlik júıesi bar, zańnamalar qabyldandy. Elbasy maqalasynda berilip otyrǵan tapsyrmaǵa baılanysty, ásirese, bizdiń mınıstrliktiń aldynda úlken talaptar, jańa baǵyttar belgilenip otyr. Bul jaǵdaıda, árıne mınıstrlik bolý kerek, jumys isteýi kerek dep oılaımyn. Bylaısha aıtqanda, jaqsy qolǵa alynǵan istiń bir kúnde kúl-talqanyn shyǵarýǵa bolady. Al ony qaıta qalpyna keltirý úshin qanshama jyl jumys isteý qajet», - dep atap kórsetti G. Ábdihalyqova.
«Synǵa durys qarap, ony da túsine bilý kerek. Óz basym syn arqyly ary qaraı shyndalýǵa jol ashylady dep aıta alamyn. Mınıstrlikke aıtylǵan syn jaqsy, durys syn bolsa, odan biz nátıje shyǵarýǵa tyrysamyz», - dedi mınıstr.
Eske sala keteıik, «Aq jol» partııasynyń tóraǵasy, Májilis depýtaty Azat Perýashev Eńbek jáne halyqty áleýmettik qorǵaý mınıstrligin taratý qajet dep málimdeme jasaǵan bolatyn.
