Fýtzaldan Qazaqstan quramasy Taılandtaǵy týrnırde top jardy
ASTANA. QazAqparat - Fýtzaldan Qazaqstan ulttyq quramasy Taılandta ótken halyqaralyq týrnırde top jardy. Sheshýshi oıynda taı oıynshylarymen teń túsip, dop aıyrmasy boıynsha jeńimpaz atandy, dep jazady massaget.kz.
Bankgogta ótken týrnırge Taıland, Iran, Japonııa men Qazaqstan fýtzal quramalary qatysty. Alǵashqy oıynda otandastarymyz Azııadaǵy alpaýyt ujymdardyń biri sanalatyn Iran quramasymen 3:3 esebimen teń oınady. Al ekinshi oıynda Japonııa quramasyn 9:0 esebimen oısyrata jeńdi. Al Taıland quramasyna qarsy oıyn teń aıaqtaldy. Bul kezdesýde de 3:3 esebi tirkeldi.
Qazaqstan men Taıland úsh oıynnyń qorytyndysy boıynsha 5 upaıdan jınady. Biraq dop aıyrmasy boıynsha otandastarymyz áldeqaıda alda boldy. Ókinishke oraı, ulttyq qurama kapıtany Dinmuhamed Súleımenov pen qaqpashy Dmıtrıı Shamro jaraqat alyp qaldy. Aldaǵy álem chempıonatyna deıin aıyǵyp ketedi degen senimdemiz.
Qazaqstan quramasy Taılandtaǵy halyqaralyq týrnırge álem chempıonatyn aldyndaǵy daıyndyǵyn shyńdaý maqsatynda qatysty. Qazirgi tańda ulttyq quramanyń daıyndyǵy men osyǵan deıingi oıyndarynyń nátıjeleri jankúıerler tarapynan joǵary baǵa alyp keledi.
Aıta keteıik, fýtzaldan álem chempıonaty 10 qyrkúıek pen 2 qazan aralyǵynda Kolýmbııada ótedi. Otandastarymyz toptyq kezeńde Argentına, Kosta-Rıka men Solomon araldary quramalarymen kezdesedi.
